Nis shpërndarja e librave falas, MASR: Përfitojnë 250 mijë nxënës të shkollave 9 vjeçare
Nis shpërndarja e teksteve falas ku përfitues do të jenë 250 mijë nxënës .Këtë vit, skema e shpërndarjes së librave falas për nxënësit e arsimit parauniversitar është zgjeruar, tekstet falas do t’i përfitojnë jo vetëm nxënësit e arsimit fillor, por edhe ata të klasave të gjashta dhe të shtata. Ndërsa për kategoritë në nevojë, librat falas do të shpërndahen deri në klasat e 12-ta. Vendimi për zgjerimin e kategorive të nxënësve që do të mbështeten nga shteti me libra falas është miratuar tashmë nga Këshilli i Ministrave.
Ndërkohë që shkollat kanë marrë udhëzimet përkatëse nga Ministria e Arsimit në lidhje me përgatitjen e listave të nxënësve që do të sigurojnë tekstet falas, si dhe skemën e mirë-administrimit të tyre përgjatë vitit shkollor. Për të gjitha këto kategori të përmendura, çmimi i blerjes së teksteve shkollore mbulohet 100 për qind nga fondet e buxhetit të shtetit. Librat shkollorë do të kalojnë nga njeri brez në tjetrin për 3 vite dhe nxënësit do të duhet t’i dorëzojnë kur mbarojnë ciklin shkollor, duke përjashtuar këtu klasat e para.
Çdo nxënës i klasës së pare librat i merr të rinj dhe jo nga viti paraardhës. Tekstet shkollore shpërndahen dhe shiten në mjediset shkollore.Çmimet e teksteve të miratuara nga ministria përgjegjëse për arsimin, indeksohen çdo vit, në përputhje me rritjen e inflacionit ato duhet të jenë të pajisura me pullën me hologramë të certifikimit, të ministrisë përgjegjëse për arsimin.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.