Nis shpërndarja e librave falas – Shahini: Sivjet në skemë edhe klasat e pesta, përfitojnë 155 mijë nxënës
Të gjithë nxënësit e klasave 1-5 mund të paraqiten pranë shkollave për të tërhequr librat falas. Sipas Ministrisë së Arsimit, Sportit dhe Rinisë, këtë vit vetëm tekstet e klasës së parë do të jenë të reja, ndërsa klasat e tjera do të marrin tekstet e përdorura një vit më parë. Ndërkaq, përmes një video mesazhi në rrjetet sociale, ministrja Besa Shahini bëri me dije se skema për këtë vit është zgjeruar edhe te klasat e 5-ta.
“Nismën e kemi filluar vjet, me një shumë prej 600 milion lekësh e cila është shpenzuar për të blerë librat për të gjithë nxënësit e klasave 1 deri 4, si dhe nxënësit e tjerë të kategorive të veçanta (me asistencë sociale, nevoja të veçanta apo minoritarë) që përfitojnë librat falas. Sivjet, ngaqë kemi ruajtur shumë mirë librat nga viti i kaluar, kemi patur mundësinë të përfshijmë edhe klasën e 5-të plotësisht në nismën e librave falas”, u shpreh Shahini.
Sipas ministrisë, rikthimi i librave në bibliotekat e shkollave për ripërdorim ka rezultuar efektiv për 80% të teksteve. Ndërsa pjesa tjetër e dëmtuar që nuk munden të përdoren, përmes një buxheti të posaçëm janë blerë nga MASR dhe do të shpërndahen nëpër shkolla. Rreth 125 mijë nxënës nga klasat e para deri në klasat e katërta përfituan vitin e kaluar libra falas, ndërsa për vitin e ri shkollor 2019-2020 numri i përfituesve është rritur në 155 mijë. Shpërndarja e librave ka filluar sot dhe mbyllet disa ditë para fillimit të shkollës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.