Nis shpërndarja në SHBA dhe Kanada. Shfaqen dërgesat e para të vaksinës, proces i jashtëzakonshëm i imunizimit
Dërgesat e para të vaksinës së Pfizer me BioNTech të Covid-19, kanë mbërritur në Shtetet e Bashkuara dhe Kanada, ndërkohë që 2 vendet po ndjekin Britaninë, në vaksinimin në masë të popullsisë. Aeroporti Ndërkombëtar i Los Angeles ka shpërndarë në media sociale imazhe të dërgesës së parë të vaksinave të koronavirusit që mbërrijnë. Përshkrimi në postimin e aeroportit në Tëitter lexonte “Pako e parë e vaksinës së Covid-19 ka mbërritur në Los Angeles”.
“Kjo është një arritje e madhe për shkencën, vendin dhe komunitetin. Faleminderit atyre që e mundësuan këtë dërgesë dhe që janë pjesë e përpjekjeve për ta shpërndarë në të gjithë botën”- shkruan aeroporti në Tëitter. Kjo ndodhi në të njejtën ditë kur avionët dhe kamionët e ngarkuara me dërgesën e parë të vaksinës nisën daljen nga qendrat e FedEx dhe UPS në Tennesse dhe Kentucky, drejt qendrave të shpërndarjes në të gjithë vendin. Ky është një projekt i imunizimit i paprecedent. Vaksinimi shihet si tejet i rëndësishëm për të ndaluar pandeminë, që po lë mbi 2,400 persona të vdekur në Shtetet e Bashkuara në ditë.
Ndërkohë, dërgesa e parë e vaksinës së Pfizer me BioNTech në Kanada ka mbërritur nga një avion i UPS në Montreal. Ushtria kanadeze deklaroi se dërgesat po mbërrijnë në pika të zgjedhura të hyrjes në vend, së bashku me video të shkarkimit të vaksinës në Montreal. “Kjo shënon një ditë historike në Kanada dhe një hap të rëndësishëm në luftën me covid-19”- deklaroi Ushtria. Kanadaja dhe Shtetet e Bashkuara pritet të bëhen këtë javë vendet e para perëndimore që nisin vaksinimin në masë, pas Mbretërisë së Bashkuar. Disa kanadezë dhe amerikanë, pritet ta marrin injeksionin që ditën e sotme.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.