Nis shpronësimi në Vorë – 9.5 milion lekë për përfituesit që preken nga zona e re për zhvillim në Marikaj

Nëpërmjet një njoftimi të publikuar në Fletoren Zyrtare është bërë me dije se Ministria e Infrastrukturës dhe Energjisë ka shpallur kërkesën për shpronësim dhe/ose për shkëmbimin e pronës, për interes publik, në zonën e re për zhvillim në Njësinë Administrative Marikaj, Bashkia Vorë.

Njësia zbatuese për këtë projekt është Fondi Shqiptar i Zhvillimit, ku me anë të këtij publikimi, kërkohet të vihen në dijeni personat e prekur nga ky shpronësim dhe/ose për shkëmbim, për interes publik, për pasuritë e paluajtshme, pronë private, të cilat do të kompensohen sipas vlerësimit paraprak të llogaritur, si:

1. Për pasurinë e llojit është bërë bazuar në vendimin nr. 89, datë 3.2.2016,të Këshillit të Ministrave, “Për miratimin e hartës së vlerës së tokës në Republikën e Shqipërisë”;
2. Për pasuritë e llojit “ndërtesë”, me funksion banimi dhe “ndërtesë”, me funksion jo banimi, është bërë sipas VKM-së nr. 138, datë 23.3.2000, “Për kriteret teknike të vlerësimit dhe të përllogaritjes së masës së shpërblimit të pasurive që shpronësohen, të pasurive që zhvlerësohen dhe të të drejtave të personave të tretë, për interes publik”, i ndryshuar, bazuar në çmimet mesatare të Entit Kombëtar të Banesave, për miratimin e kostos mesatare të ndërtimit, për vitin 2016;

Kërkesa për shpronësim dhe/ose shkëmbimin e pronës, për interes publik, në funksion të procesit të rindërtimit, është me vlerë totale paraprake të kompensimit nga shpronësimi në shumën 9 517 469 (nëntë milionë e pesëqind e shtatëmbëdhjetë mijë e katërqind e gjashtëdhjetë e nëntë) lekë.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.