Nis shqyrtimi për rritjen e tarifave të energjisë – Zbardhen tarifat e reja që kërkojnë kompanitë, OST kërkon rritje me 96%
Enti Rregullator i Energjisë vendosi nisjen e procedurës për shqyrtimin e aplikimeve të Operatorit të Sistemit të Shpërndarjes dhe Operatorit të Sistemit të Transmetimit për rritjen e tarifave të shpërndarjes dhe transmetimit të energjisë elektrike për vitin 2022.
Referuar aplikimeve, OSSH ka kërkuar që për klientëte lidhur në tensionin 35 KV, tarifa e shpërndarjes të shkojë në 2.61 lekë kwh, nga 1.5 lekë/kwh që është aktualisht, ndërsa për tensionin 0.6-20 KV të shkojë 3.99 lekë/Kwh nga 3.9 lekë/kwh që është aktualisht.
Për klientët e tjerë fundorë të lidhur me rrjetin e shpërndarjes në nivelet e tjerë të tensionit, OSSH aktualisht faturon energjinë e lëvruar bazuar në tarifën mesatare të shpërndarjes së energjisë elektrike prej 4.79 lekë/kwh, ndërkohë që në aplikimi kërkuar që kjo tarifë të shkojë në 6.63 lekë/kwh. Ndërkaq, kompania tjetër publike që është OST kërkon një rritje me 96% nga tarifa aktuale, duke shkuar në 1.47 lekë/kwh.
Gjatë diskutimeve, anëtarët e Bordit të ERE-s thanë se do të jenë të kujdeshëm në procesin e shqyrtimit të këtyre kërkesave, duke sugjeruar edhe gjetjen e burimeve të tjera të financimit për përballimin e kostove nga an e kompanive.
Rritja e tarifave të transmetimit dhe shpërndarjes impakton drejtpërdrejt bizneset që kanë dalë në treg të lirë energjie, por edhe abonentët familjarë e biznese që furnizohen nga Furnizuesi i Shërbimit Universal, që është pjesë e OSHEE-së. Kjo pasi kjo tarifë është pjesë përbërëse e formulës për përllogaritjen e çmimit final të energjisë, që aplikohet nga FSHU për klientët e saj. Ndërkaq, referuar procedurave standard është pikërisht Enti Rregullator i Energjisë, që vendos mbi nivelin e tarifave përfundimtare që do të aplikohen gjatë vitit 2022.
Paralelisht, në pritje është edhe aplikimi që do të kryhet nga Furnizuesi i Shërbimit Universal, për çmimin e shitjes me pakicë të energjisë e nëse kjo kompani do të zgjedhë të përballojë me të ardhuart e veta rritjen e mundshme të tarifave të transemtimit dhe shpërndarjes apo të shkarkojë këtë rritje tek abonentët e saj familjarë e biznese.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.