Nis vaksinimi i punonjësve të transportit publik – Rama: Pritet lehtësim i masave shtrënguese anti-COVID
Ka nisur të mërkurën në Sheshin Skënderbej vaksinimi i rreth 14 mijë punonjësve të transportit publik. Sipas burimeve zyrtare, procesi i vaksinimit do të kryhet me dozat e AstraZeneca dhe Sputnik-V. për të parë nga afër nisjen e këtij procesi ishin të pranishëm Kryeministri Edi Rama dhe ministrja e Shëndetësisë, Ogerta Manastirliu.
“Sot nisi vaksinimi i punonjësve të transportit publik, dhe po vijon edhe vaksinim i për punonjësit e hoteleri turizmit ku janë vaksinuar rreth 6 mijë prej tyre. Janë vaksinuar gjithashtu edhe 9 mijë punonjës të fasonerive. Objektivi ynë është ulja e grupmoshë. Jemi në një situatë të mirë për sa i përket situatës epidemiologjike, nesër mblidhet komiteti për lehtësimin e masave”, tha Manastirliu.
“Ajo që mund të shtoj është se jemi në një situatë optimale në raport me strategjinë dhe planin e veprimit por është shumë e rëndësishme të mos të harrojmë se kemi parashikueshmëri të plotë lidhur me rrugën drejt daljes përfundimtare nga ky tunel, duhet të vazhdojmë të jemi të kujdesshëm. Nesër komiteti do të dalë me planin e ri me lehtësim të mëtejshëm të masa. Ambicia jonë për të pasur një lehtësim të masave më shumë se vitin e kaluar”, tha Rama
Në total, që nga fillimi i procesit, janë vaksinuar 736.365 persona. Në Shqipëri deri më tani kanë mbërritur më shumë se 847 mijë doza të vaksinave kundër COVID, ndërsa objektivi i qeverisë është kryerja e 1 milion vaksinimeve brenda qershorit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.