Nisin pabarazitë e çmimit të vaksinave – Në Afrikën e jugut dozat 2.5 herë më të shtrenjta se në Europë
Afrika e Jugut do të blejë doza të vaksinës COVID-19 të Oxford-AstraZeneca me një çmim 2.5 herë më të lartë se shumica e vendeve europiane, tha të enjten ministria e shëndetësisë.
Vendi më i prekur nga virusi në kontinentit ka porositur të paktën 1.5 milion doza vaksine nga Instituti i Serumit i Indisë, që pritet në janar dhe shkurt.
Një zyrtar i lartë i shëndetësisë i tha agjencisë së lajmeve AFP se ato doza do të kushtonin 5.25 dollarë secila, gati 2.5 herë shuma e paguar nga shumica e vendeve europiane.
“Departamenti Kombëtar i Shëndetësisë konfirmon se çmimi 5.25 dollarë është ai që na u citua”, tha zëvendës drejtori i përgjithshëm i shëndetësisë Anban Pillay përmes mesazhit me tekst, pa shpjeguar ndryshimin e çmimit.
Anëtarët e Bashkimit Europian do të paguajnë vetëm 1.78 euro (2.16 dollarë) për dozat e AstraZeneca, sipas informacionit të dalë nga një ministër belg në Twitter muajin e kaluar.
Marrëveshjet dypalëshe midis qeverive më të pasura dhe prodhuesve të vaksinave koronavirus kanë ngritur shqetësimin mbi rritjen e çmimeve dhe mungesën e furnizimit për vendet me të ardhura të ulëta dhe të mesme.
Organizata Botërore e Shëndetësisë vitin e kaluar paralajmëroi kundër “nacionalizmit të vaksinave” dhe “rritjes së çmimeve” sapo u gjet një vaksinë e suksesshme.
AstraZeneca France i tha AFP në nëntor se vaksinat e saj do të shiten me 2.5 euro (rreth 3 dollarë) për dozë “për të siguruar vaksina për popullatën më të gjerë, me një qasje sa më të drejtë të jetë e mundur”.
Gjiganti farmaceutik nuk iu përgjigj menjëherë kërkesave për komente mbi vlerësimin e çmimeve të ministrisë së shëndetësisë.
Porosia e vaksinave AstraZeneca e Afrikës së Jugut është pjesë e 20 milion dozave të siguruara që do të shpërndahen në gjysmën e parë të 2021.
Objekti i mbështetur nga OBSH-ja Covax pritet të sigurojë doza për 10 përqind të popullsisë midis prillit dhe qershorit. Vaksinat e tjera do të sigurohen përmes Bashkimit Afrikan dhe kontratave dypalëshe me furnitorët që nuk janë zbuluar ende.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.