Nisma më e re e ‘Instagram’ për të fshehur ‘pëlqimet’ në postime kundërshtohet ashpër nga shumica e përdoruesve

Instagram po teston një veçori të re në SH.B.A. këtë javë që mund të jetë padyshim më e debatueshmja deri tani që nga themelimi i saj: fshehja e numrit të “pëlqimeve” në postime.

Karakteristika e re, e paralajmëruar nga Drejtori i Përgjithshëm i Instagramit, Adam Mosseri, po përballet me reagime të forta, veçanërisht nga shumë influencues dhe të famshëm.

Kjo nismë është testuar tashmë në shtatë vende përfshirë Australinë, Irlandën dhe Kanadanë muajt e fundit. Gjatë kryerjes së testimit, “influencuesit, blogerët dhe fashionistët” u ankuan se fshehja e pëlqimeve do t’u jepte atyre më pak fuqi negociatash ndaj marrëveshjeve të markave dhe përmbajtjes së sponsorizuar.

Tani, shumë personazhe të famshëm amerikanë janë duke i bërë thirrje drejtuesve të aplikacionit që të ndalojnë eksperimentimet me heqjen e pëlqimeve, me disa duke kërcënuar se do të ndalojnë së postuari në këtë rrjet social. Shumë të tjerë kanë zgjedhur të bëjnë shaka në Tëitter për ndryshimet e propozuara.

Por disa, përfshirë Kim Kardashian, e kanë paralajmëruar vendimin në Instagram si një ndihmë për shëndetin mendor të përdoruesve.

“Ne po e testojmë këtë nismë, sepse duam që Instagrami të jetë një vend ku njerëzit të ndjehen të qetë duke u shprehur. Kjo përfshin ndihmën e njerëzve që të përqendrohen në fotografi dhe video që ata ndajnë, e jo sa pëlqime marrin”, ka thënë një zëdhënës për Facebook, i cili zotëron Instagram.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.