Nisma për  gjelbërimin – Qytetarë dhe biznese i janë përgjigjur thirrjes së Bashkisë së Tiranës

Qytetarë dhe biznese i janë përgjigjur thirrjes së Bashkisë së Tiranës për t’i dhënë më shumë gjelbërim qytetit, në plotësim të misionit për Pyllin Orbital. Kësaj here, pjesë e nismës  është bërë edhe institucioni i Drejtorisë Rajonale të Autoritetit Rrugor Shqiptar duke mbjellë peme pranë parkut të liqenit artificial të Tiranës. Kryebashkiaku Erion Veliaj e vlerësoi angazhimin e qytetareve ndërsa i ftoi që të shfrytëzojë festat apo ditë shënuara të tyre, si një angazhim personal që secili mund të japë për një qytet më të mirë.

“Jemi në gjysmë të planit tonë për këtë vit, kemi edhe një muaj e gjysmë për të thyer prapë rekordin. Dua të ftoj të gjithë të mbjellim pemë për 14 marsin, Ditën e Verës, të mbjellim një pemë për fëmijët që do jetë këtu gjithë jetën. Kush mbjell një pemë, jo vetëm që nuk këput pemë, por nuk ofendon, nuk flet me zë të lartë, nuk hedh mbeturina në tokë dhe unë besoj se më shumë se mbjellje fidanësh e pemësh, është më shumë mbjellje e një kulture dhe një mentaliteti të ri në këtë hapësirën ku mbillen idetë tona, që është kultura jonë qytetare”, tha kreu i Bashkisë.

Drejtori Rajonal i Autoritetit Rrugor Shqiptar, Erion Koka po ashtu theksoi se nuk është koha për tu ankuar por për tu angazhuar seriozisht   në ndryshimin e  qytetit .

“Kur kemi ardhur si studentë, si pikë referimi kemi pasur pikërisht këtë park, ishim të lodhur të dëgjonim vetëm njerëz që ankoheshin për mjedisin e ndotur, për mungesën e pemëve, për ndotjen e ajrit. Është momenti që secili të japë diçka nga vetja e vet për të rregulluar situatën, se ankesat nuk do na çojnë askund. E mbështes jashtëzakonisht shumë nismën e kryetarit të Bashkisë për zhvillimin e parkut dhe parqeve të reja që janë ngritur dhe Pyllit Orbital që po ndërtohet rreth e qark Liqenit. Ishte gjëja më e mirë e mundshme që mund të bënim”- tha Koka.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.