Një banke e re hyn në Shqipëri!
“Na falni për vonesën”. 15 vjet pasi humbi garën për të blerë ish-Bankën e Kursimeve, grupi hungarez “OTP” është drejt hyrjes në tregun shqiptar. Rruga do të jetë blerja e bankës së pestë më të madhe në vend, “Societe Generale – Albania”.
Burime të brendshme nga banka “Societe Generale” shprehen se vendimi është marrë dhe pritet të zyrtarizohet gjatë muajve të ardhshëm. Përfaqësuesit e bankës hungareze kanë qenë gjatë muajit maj në Shqipëri dhe janë prezantuar me stafin e bankës, përfshi këtu edhe rrjetin e degëve. Shitja e shpejtë e “Societe Generale” te grupi hungarez, në fakt, ishte një zhvillim deri diku i papritur.
Deri vitin e kaluar, “Societe Generale” nuk bënte aspak pjesë në grupin e bankave që kishin marrë vendimin për t’u larguar nga Shqipëria, siç kishte ndodhur me shumicën e bankave greke apo me banka të tjera më të vogla. Negociatat me “OTP” u zhvilluan në formë private dhe përfshijnë edhe filiale të tjera të grupit francez në vendet e Ballkanit. Vitin e kaluar, “OTP” bleu edhe “Splitska Banka”, ish-bankën kroate të grupit “Societe Generale”.
Largimi i papritur i “Societe Generale”
Sipas të dhënave më të fundit nga Shoqata Shqiptare e Bankave, në fund të muajit mars banka “Societe Generale” – Shqipëri” zotëronte 5.76% të aktiveve të sistemit bankar shqiptar, për një vlerë totale prej 83 miliardë lekësh. Ndryshe nga shumica e bankave që i takojnë grupeve të Eurozonës, “Societe Generale” nuk ka mbajtur aspak pozita mbrojtëse dhe konsoliduese gjatë viteve të fundit.
Në harkun e pesë viteve të fundit, aktivet e bankës janë rritur me 24%. Pjesa e tregut të bankës franceze është rritur në mënyrë të ngadaltë, por të vazhdueshme. “Societe Generale” është huadhënësi i katërt më i madh në ekonominë shqiptare, pas “BKT”, “Credins” dhe “Raiffeisen”.
Në fund të tremujorit të parë 2018, “Societe Generale – Shqipëri” kishte një portofol kredie në vlerën e afro 50 miliardë lekëve ose rreth 390 milionë eurove.
Pasi bleu në vitin 2008 ish-“Bankën Popullore”, “Societe Generale” ndërmori një proces ristrukturimi të shpejtë, me qëllim pastrimin e kredive të këqija dhe modernizimin e bankës. Ky proces bëri që “Societe Generale” të ishte më e shëndetshme gjatë viteve më të vështira të krizës, krahasuar me shumicën e bankave të tjera me kapital të huaj. Për këtë arsye, vendimi për t’u larguar ishte pjesërisht i papritur.
Megjithatë, duket se pasojat e krizës dhe efektet e rregullave të reja të mbikëqyrjes bankare në Eurozonë kanë kushtëzuar edhe strategjitë e gjigantit francez. Grupeve bankare europiane do t’iu kërkohet më shumë mbulim me kapital për aktivet që zotërojnë jashtë Bashkimit Europian. Rrjedhimisht, kjo rrit koston e mbajtjes së bankave që nuk zotërojnë pjesë shumë të madhe tregu dhe që nuk sigurojnë fitime domethënëse. Ky mund të jetë shpjegimi më i mundshëm i vendimit për të lënë Shqipërisë dhe vendet të tjera të Rajonit.
“OTP”: Nga bankë kursimesh në grup rajonal
Me blerjen e “Societe Generale”, “OTP” bëhet grupi i parë bankar nga Bashkimi Europian që hyn në tregun bankar shqiptar për më shumë se një dekadë. Pasi nuk arriti të blejë ish-“Bankën e Kursimeve” në vitin 2003, “OTP” vjen në tregun shqiptar në një moment të ndryshëm.
Nëse 15 vjet më parë tregu bankar shqiptar ishte objekt i interesit të shumë bankave të huaja, për shkak të potencialeve të mëdha të rritjes, tashmë tregu ynë është ndjeshëm më pak tërheqës. Kjo nuk vlen vetëm për Shqipërinë, por për shumicën e tregjeve bankare të Europës Lindore.
“OTP” lindi në vitin 1949 si Banka Kombëtare e Kursimeve në Hungari. Për shkak të kufizimeve të lidhura me sistemin politik dhe ekonomik në Hungari, deri në vitin 1989 aktiviteti i “OTP” ishte i fokusuar kryesisht në produktet dhe shërbimet bazike për individë, si mbledhja e kursimeve dhe dhënia e huave.
Pas vitit 1989, ajo nisi aktivitetin si një bankë e mirëfilltë tregtare, me fokus edhe klientët biznese. Në vitin 1995, “OTP” u privatizua përmes ofertës publike të aksioneve në Bursën e Budapestit. Banka sot ka një strukturë aksionerësh mjaft të diversifikuar, ku përfshihen shumë investitorë institucionalë dhe individualë, hungarezë dhe të huaj.
Katër aksionerët më të mëdhenj janë “MOL” (kompania hungareze e naftës dhe gazit) me 8.57%, familja hungareze me origjinë ruse Rahimkulov me 7.93%, “OPUS Securities” me 5.18% dhe grupi francez i sigurimeve “Groupama” me 5.12%. “OTP” është bindshëm banka më e madhe në tregun hungarez, me mbi 25% të aktiveve totale të tregut. Pas privatizimit, “OTP” nisi një proces gradual të zgjerimit në tregjet e tjerë të Europës Qendrore dhe Lindore.
Veç aktivitetit në Hungari, aktualisht “OTP” zotëron banka në Bullgari, Kroaci, Rumani, Serbi, Mal të Zi, Sllovaki, Ukrainë dhe Rusi. Në total, brupi bankar “OTP” numëron një rrjet prej 1500 degësh bankare dhe rreth 17 milionë klientë. Totali i aktiveve të grupit bankar “OTP” vlerësohet në më shumë se 42 miliardë euro. Përveç bankave tregtare, “OTP” zotëron kompani edhe në segmente të tjera të tregut financiar, si fonde investimesh, pensionesh, kompani të menaxhimit të aseteve, etj në vende të ndryshme të Europës Qendrore dhe Lindore.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.