Një europian tjetër për FMN – “Të ruhet tradita”. Flitet për Dijsselbloem, Georgieva dhe Stubb
Bashkimi Europian kërkon një europian që të zëvendësojë Christine Lagarde te Fondi Monetar Ndërkombëtar, duke vazhduar traditën e mbajtjes së postit nga kontinenti i vjetër. Fondi do të duhet të zëvendësojë Lagarde pasi ajo u nominua javën e kaluar nga liderët europian që të bëhet presidentja e ardhshme e Bankës Qendrore Europiane. Emrat e përmendur në mënyrë informale nga zyrtarët përfshijnë ish-kreun e Eurogrupit, Jeroen Dijsselbloem, ish-kryeministrin e Finlandës, Alexander Stubb dhe ekzekutiven aktuale të Bankës Botërore, Kristalina Georgieva.
Kjo u diskutua nga ministrat e financave të Eurozonës gjatë një takimi në nisje të javës, sipas kreut aktual të Eurogrupit, Mario Centeno, por nuk është marrë asnjë vendim duke marrë parasysh se vetë FMN nuk ka hapur ende procedurën e zëvëndësimit. Ministrja spanjolle e financave, Nadia Calvino, tha se prioritet është që drejtori i përgjithshëm të vazhdojë të jetë europian. Ministri francez, Bruno Le Maire, i bëri thirrje shteteve të BE që të gjejnë një kandidat të përbashkët sa më shpejtë të jetë e mundur. SHBA, pavarësisht se janë mbështetësit më të mëdhenj financiar të FMN, nuk ofrojnë kandidat, pasi nën një marrëveshje informale me europianët, i takon drejtimi i Bankës Botërore.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.