“Një fabul e re për Shqipërinë turistike” – Çfarë parashikon strategjia e re e marketingut e Ministrisë së Turizmit?
Shqipëria do jetë pjesë e një ‘fushate marketingu’ nga Ministria e Turizmit dhe Mjedisit, në bashkëpunim me Agjencinë Kombëtare të Turizmit.
Ky projekt, do të ketë si qëllim të përcjellë ‘zërin’ e atraksioneve turistike shqiptare në ‘veshët e duhur’.
Strategjia e promovimit të markës ‘Shqipëri’, do të ketë në fokus produktet autentike shqiptare, ri-jetëzimin e miteve, historive, që do t`u shërbejnë organizatave promovuese për të rimodeluar një “fabul” për Shqipërinë turistike.
Ndërkohë përmes ‘rrugëve’ të ndryshme të marketingut do të evidentohen “target grupet” dhe llojet e turistëve që do të duhet të njihen me potencialet e Shqipërisë.
‘Produktet turistike (ose ofertat turistike) të Shqipërisë mund të jenë tepër të larmishme duke filluar që nga destinacionet, vlerat historike dhe kulturore e deri tek prodhimet artizanale, ushqimet dhe pijet karakteristike, etj.
Këto produkte do të promovohen vazhdimisht, jo vetëm përgjatë sezonit veror, por gjatë të gjitha stineve të vitit, duke synuar njëkohësisht edhe audienca specifike.
Do të synohet ngritja e një strukture pranë përfaqësive tona diplomatike si edhe përdorimi sa më efektiv i kanaleve të tjera të promovimit’ shkruan Agjencia Kombëtare e Turizmin në dokumentat e projektit.
Ndërkohë, marketingu, nëpërmjet ‘fushatës’ online, do të rrisë trafikun në ëebsite-in zyrtar që do të krijohet posaçërisht për turizmin shqiptar, nëpërmjet ‘pagesave për klikim’ në Google.
Gjithashtu, paketat promocionale që promovojnë vendin, do t’i jepen si ‘dhuratë’ delegacioneve të huaja vizituese të Shqipërisë, ose në panaire të ndryshme të botës.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.