‘Një fitore për të drejtat globale të njeriut’ – BE bie dakord mbi rregulla më të rrepta për eksportet e teknologjisë së mbikëqyrjes
Bashkimi Europian të hënën ra dakord të forcojë rregullat për shitjen dhe eksportin e teknologjisë së mbikëqyrjes kibernetike. Ligjvënësit e BE dhe Këshilli Europian arritën një marrëveshje të përkohshme për të azhurnuar kontrollet e të ashtuquajturave mallra me përdorim të dyfishtë siç janë teknologjia e njohjes së fytyrës dhe spiunet për të parandaluar që ato të përdoren për të shkelur të drejtat e njeriut.
Sipas rregullave të reja, kompanitë europiane do të duhet të aplikojnë për licenca qeveritare për të eksportuar produkte të caktuara dhe ata do të duhet të plotësojnë kriteret që janë shtuar për të përfshirë kërkesat për të marrë parasysh nëse shitja paraqet rrezik për të drejtat e njeriut.
Vendet e BE-së gjithashtu do të duhet të jenë më transparentë duke zbuluar detaje në lidhje me licencat e eksportit që ata japin. Dhe rregullat gjithashtu mund të ndryshohen me shpejtësi për të mbuluar teknologjitë në zhvillim.
Teknologjia me përdorim të dyfishtë mund të përfshijë gjithashtu kompjuter me performancë të lartë, dronë dhe kimikate të caktuara.
“Sot është një fitore për të drejtat globale të njeriut. Ne kemi dhënë një shembull të rëndësishëm për demokracitë e tjera që ato duhet të ndjekin,” tha Marketa Gregorova, një ligjvënëse e Parlamentit Europian që ishte një nga negociatorët kryesorë, në një deklaratë. “Regjimet autoritare nuk do të jenë më në gjendje të fusin fshehurazi duart e tyre në mbikëqyrjen kibernetike europiane.”
Rregullat aktuale në fuqi u prezantuan në 2009. Këshilli i BE tha në një deklaratë se sistemi duhej “të adaptohej në ndryshimin e rrethanave teknologjike, ekonomike dhe politike”.
Peter Altmaeier, ministër i ekonomisë për Gjermaninë – i cili aktualisht mban presidencën e radhës së bllokut – tha “rregullat e reja vendosin ekuilibrin e duhur midis forcimit të konkurrencës së BE, duke siguruar interesat tona dhe promovimin e të drejtave të njeriut”.
Marrëveshja vjen pas vitesh negociatash dhe ende ka nevojë për miratim zyrtar nga Parlamenti Europian dhe organe të tjera, por kjo pritet të jetë një formalitet.
Grupet e të drejtave të njeriut kanë kërkuar që BE të shtrëngojë rregullat e eksportit. Amnesty International tha në një raport të fundit se rregulloret ekzistuese të bllokut nuk arrijnë të adresojnë “dinamikën e mbikëqyrjes që ndryshon me shpejtësi” ose marrin parasysh rreziqet e paraqitura nga teknologjia e re e mbikëqyrjes dixhitale. Grupi tha se gjeti tre kompani europiane që shisnin teknologjinë e mbikëqyrjes dixhitale në Kinë. (Euronews)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.