Një majmun me çip luan video-lojë / Elon Musk në përpjekje për të mundësuar telepatinë dhe shkarkimin e kujtimeve tek njerëzit me paralizë
Ëndrra e Elon Musk për të bashkuar trurin dhe kompjuterët duket se është afër realizimit të saj.
Një video e postuar në YouTube nga Neuralink tregon një makaka të pajisur me një implant nervor duke luajtur Pong dhe duke përdorur vetëm mendimin për të lëvizur shufrat që simulojnë raketat e pongut në ekran.
“Një majmun është duke luajtur një video lojë në mënyrë telepatike duke përdorur një çip të trurit !!” – tha Musk, i cili ka argumentuar prej kohësh se bashkimi i mendjeve me makineritë është jetik nëse njerëzit duan të shmangin tejkalimin nga AI.
Pajisjet Neuralink u implantuan në dy anët e trurit të majmunit Pager, për të zbuluar aktivitetin e neuroneve të tij. Sistemi mund të kalibrohet për të lejuar një person të drejtojë një kursor në një ekran kompjuteri, duke i lejuar ata potencialisht të shkruajnë email, mesazhe me tekst, ose të shfletojnë internetin thjesht duke menduar, sipas një postimi në blog në neuralink.com.
“Qëllimi ynë kryesor është të rikthejmë lirinë dixhitale tek njerëzit me paralizë,” thotë ekipi i Neuralink në postim. Anëtarët e ekipit vitin e kaluar botuan një “listë dëshirash” mbi aplikimet e mundshme të teknologjisë së re që jep mundësinë e rikthimit të lëvizshmërisë tek të paralizuarit dhe shikimit tek të verbërit, duke mundësuar telepatinë dhe shkarkimin e kujtimeve, për t’u ngarkuar ndoshta.
Tani për tani, Neuralink po i nënshtrohet testimit të kafshëve. Me ndihmën e një roboti kirurgjik, një pjesë e kafkës zëvendësohet me një disk Neuralink dhe kabllot e saj shumë të hollë futen në tru. Disku regjistron aktivitetin nervor, duke transmetuar informacione përmes një sinjali wireless Bluetooth në një pajisje të tillë si smartphone.
“Në të vërtetë i përshtatet kafkës tuaj mjaft mirë, mund të jetë nën flokët tuaj dhe nuk do ta kuptonit.” – thotë Musk.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.