Një muaj larg Brexit-Opozita në Britani mban referendumin e dytë si rrjetë sigurie
Opozita e Britanisë po mbështet një referendum të dytë për Brexit dhe mund ta bëjë brenda kësaj jave, sipas politikanëve të partisë. Ndërkohë që vetëm 1 muaj ka mbetur përpara se Britania të dalë nga Bashkimi Europian, Kryeministrja Theresa May nuk ka arritur ende në një dakordësi përfundimtare për marrëveshjen e saj të Brexit me Brukselin.
Lideri i laburistëve, Jeremy Corbyn, ka mbajtur alternativën e një referendumi të dytë, nëse qeveria e Theresa May dështon të arrijë një marrëveshje me Brukselin që të kalohet në parlament. May i ka premtuar parlamentit se do të ketë mundësi të votojë për hapat e radhës për Brexit më 27 Shkurt dhe politikanët synojnë të propozojnë ndryshime të planit të saj, përfshirë mundësinë e një referendumi. Tom Watson, zv/lideri i laburistëve, tha se ka shumë mundësi që të zhvillohet një referendm i dytë.
Zëdhënësi i financave i partisë, John McDonnell, dha komente të ngjashme në një intervistë për BBC, ndërsa zëdhënësi i tregtisë, Barry Gardiner tha se ideja e një referendumi të dytë mund të kthehet në një rrjet sigurie, ndërkohë që Britania po i afrohet daljes pa marrëveshje. Megjithatë, sipas laburistëve, votimi në publik nuk do të përfshijë marrëveshjen e Theresa May, pasi i mungon besueshmëria.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.