Një natë në Luvër – “Airbnb” organizon lotarinë, fituesi, darkë çift dhe koncert përballë Mona Lizës
“Një natë në muze” de të kthehet në realitet për 2 fatlumët që do të fitojnë lotarinë për të kaluar një natë në muzeun e Luvrit në Paris. Idea dhe realizimi vjen nga gjiganti “Airbnb”. Vizita ekskluzive në muze do të përfshijë një tur nga një historian arti, si dhe mundësinë për të trokitur gotat e verës përballë Mona Lizës, si dhe për të darkuar përkrah statujës së Venus de Milo. Darka do të shoqërohet nga një koncert privat në dhomat e Napoleonit të III-të, përpara se të ftuarit të kalojnë natën brenda mini-piramidës, të ndërtuar posaçërisht për këtë rast.
Menaxherja e komunikimit të Airbnb në Francë, Celia Zaidi, thotë se një natë në Muzeun e Luvrit është një mënyrë mjaft e përshtatshme për të shënjuar 10 vjetorin e platformës që tashmë është e njohur në të gjithë botën.
Edhe Piramida ikonë e Luvirt, së fundmi ka festuar 30-vjetorin e saj. Lotaria në fjalë, e nisur që në datën 2 Prill, do të bëhet mbi bazën e një pyetje: “Përse mendoni se duhet të jeni ju mysafiri perfekt i Mona Lizës?”. Ata që do marrin pjesë në lotari kanë afat deri në 12 Prill për t`iu përgjigjur kësaj pyetje.
“Airbnb” do të përzgjedhë përgjigjen më të veçantë si dhe do të paguajë për fituesin si dhe personin tjetër që ky i fundit do të zgjedhë për të udhëtuar në Paris për darkën dhe mbrëmjen e veçantë brenda muzeut më të famshëm në Botë. Një natë në Luvër ka organizuar më parë ture private për Barack Obamën apo Beyonce.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.