Një në tre, pa pushime – 32.9% e europianëve nuk i përballojnë dot
Një pjesë e madhe e europianëve, një e treta e tyre, nuk mund të përballojnë dot pushimet e verës, qoftë një javë, larg shtëpisë së tyre.
Të dhënat e fundit të Eurostat tregojnë se, 32.9% e qytetarëve të Bashkimit Europian nuk mund ta përballojnë diçka të tillë.
Kjo normë është më e lartë mes familjarëve që kanë fëmijë, 34.6%, sesa ata që nuk kanë fëmijë, 31.3%. Gjithsesi, kjo normë varion nga shteti në shtet, dhe hendeku është gjigand.
Në Suedi, sipas Eurostat, vetëm 8.2% e qytetarëve e kanë të pamundur të përballojnë një javë pushime verore larg shtëpisë së tyre. Në Rumani ndërkohë, norma ngjitet në 66.6% të qytetarëve, dhe në Kroaci në 62.8%. Edhe në Greqi, Bullgari, Qipro dhe Hungari më shumë se gjysma e popullsisë e ka të pamundur të përballojë pushimet verore.
Gjithsesi, në harkun e pesë viteve të fundit norma e atyre që nuk mund të përballojë pushimet ka rënë në të gjitha vendet anëtare, me përjashtim të Qipros, Danimarkës dhe Greqisë.
Në vende si Letonia ndërkohë, norma ka rënë nga 63.4% në 37.1%. Rënie me mbi 15 pikë përqindje regjistrojnë edhe Polonia, Estonia, Bullgaria, Malta dhe Hungaria.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.