“Një pandemi e të pavaksinuarve” – Leyen bën thirrje për vaksinim të shpejtë, në fjalimin e gjendjes së BE
Vaksinimi kundër Covid-19 duhet të marrë vrull për të shmangur një “pandemi të të pavaksinuarve”, sipas ekzekutives së Bashkimit Europian, që i bëri gjithashtu thirrje vendeve në botë që të përshpejtojnë luftën kundër ndryshimit klimatik. Fjalimi i dytë i Ursula von der Leyen mbi “gjendjen e Bashkimit Europian”, që kur mori detyrën si presidente e Komisiojnit, vjen pas 2 viteve që kanë testuar qëndrueshmërinë e bllokut me pandeminë e koronavirusit, përmbysje ekonomike, sfidat me Brexit dhe sundimin e ligjit në vendet e lindjes.
“Prioriteti ynë i parë dhe më urgjent është përshpejtimi i vaksinimit në të gjithë botën. Me më pak se 1% të dozave botërore që janë administruar në vendet me të ardhura të ulëta, shkalla e padrejtësisë dhe niveli i urgjencës është i dukshëm. Kjo përbën një nga çështjet më të mëdha gjeopolitike të kohërave tona” u shpreh Ursula von der Leyen.
Në një fjalim të gjerë që caktoi prioritetet për vitin, von der Leyen listoi gjithashtu objektiva ambiciozë, përfshirë pavarësi teknologjike të BE, por paralajmëroi se viti i ardhshëm dotë jetë një tjetër test për rajonin. Në fund të muajit Gusht, 70% e popullsisë së rritur në 27 vendet e BE ishin vaksinuar plotësisht ndaj Covid-19. KJo solli një arritje duke marrë parasysh nisjen e ngadaltë, pavarësisht se maskon normat e ndryshme mes vendeve anëtare. Von der Leyen lajmëroi një tjetër dhurim të 200 milionë doza të vaksinave deri në mes të vitit të ardhshëm për vendet e treta, përveç premtimit të mëparshëm prej 250 milionë doza.
“Ne kishim premtuar shpërndarjen e 250 milionë dozave të vaksinës. Sot unë lajmëroj se komisioni europian do të shtojë dhurimet me 200 milionë doza të tjera deri në mes të vitit të ardhshëm. Ky është një investim në solidaritet dhe në shëndetin botëror”, shtoi ajo.
Presidentja e komisionit tha gjithashtu se është e shqetësuar nga normat shumë të ndryshme të vaksinimit mes vendeve anëtare. Ajo tha se duhet bërë e pamundura që të mos kthehet situata në një pandemi të të pavaksinuarve.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.