Një test më i shpejtë dhe i saktë se PCR, studimi: “CorDial-1 mund të disponohet së shpejti në telefona”

Hulumtuesit francezë po përdorin grimca të vogla të antitrupave të nxjerrë nga familja e kafshëve që përfshin devetë dhe lamat,  për të prodhuar një test që sipas tyre mund të zbulojë nëse pacientët kanë Covid-19, më shpejtë dhe më saktë se metodat aktuale.  Testi prototip, i quajtir CorDial-1, nuk është miratuar për përdorim, por provat fillestare nga 300 mostra, treguan një saktësi prej 90% krahasuar me një test të reagimit zinxhir të polimerazës, apo PCR, që është metoda më e besueshme e përdorur gjerësisht për të zbuluar Covid-19.  Testi prototip mund të japë rezultate brenda 10 minutash dhe mund të përdoret jashtë laboratorëve, sipas ekipit që po e zhvillon, ndërkohë që testi PCR zakonisht kërkon disa orë dhe kushte laboratorike.  Ekzistojnë disa teste të shpejta dhe që merren me vete të Covid-19, por disa shkencëtarë kanë ngritur dyshimet mbi besueshmërinë.

CorDial-1 përdor fragmente të antitrupave të quajtor nanotrupa. Ato janë derivuar nga familja që përfshin devetë,  dromedarët, alpakat dhe lamat, për shkak se janë më të qëndrueshme se antitrupat e kafshëve të tjera.  Për testet e Covid-19,  nanotrupat futen në sipërfaqen e një elektrode. Kur këto kontaktojnë proteinën “gjemb” të virusit, ato prodhojnë një ndryshim të rrymës elektrike tek elektroda. Kur aparati i testimit, një pajisje me përmasën e një USB-je të madhe, lidhet me një smartphone, rryma tregon një sinjal në një grafik. “Në varësi të lartësisë së sinjalit, mund të thuhet nëse je pozitiv me Covid apo negativ”- tha Sabine Szunerits, tek Universiteti i  Lille, që po bashkëpunon për projektin me shkencëtarë nga Universiteti i Marsejës dhe  Qendra Kombëtare për Hulumtime Shkencore.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.