Një tjetër qytet ndjek Londrën – Refuzon rinovimin e licencës së Uber
Pas Londrës, edhe Brighton ka refuzuar të rinovojë licencën e Uber. Sipas këshillit, kjo ka ardhur pasi ky shërbim nuk ishte i përshtatshëm dhe i duhur për të mbajtur një licencë, duke sjellë në vëmendje shqetësimet mbi shkeljen e të dhënave dhe përdorimin e shoferëve jashtë zonës.
“Prioriteti ynë është siguria e banorëve dhe vizitorëve dhe për shkak të shkeljes së të dhënave dhe mungesës së angazhimit për përdorimin e shoferëve të licencuar këtu, ne nuk ishim të kënaqur që Uber të vazhdojë të mbajë një licencë”, tha kryetarja e panelit të licencimit Jackie O’Quinn.
Brighton është qyteti i tretë në Britaninë e Madhe që ndaloi licencimin e Uber për të operuar pas Londrës në shtator dhe York në dhjetor të vitit të kaluar. Sheffild gjithashtu ndaloi firmën të operonte në dhjetor, por më pas vendosi t’i japë kompanisë një licencë 5-vjeçare në mars.
Sipas ‘Business Insider’, Uber deklaroi se vendimi i Brighton ishte “zhgënjyes” dhe tha se ka ndërmend ta apelojë ndalimin. O’Quinn tha se Uber kishte një angazhim i cili konsistonte në vendosjen e shoferëve të licencuar nga qyteti, që sipas saj nuk është mbajtur nga kompania.
“Ne nuk e ndiejmë se fryma e këtij angazhimi është mbajtur. Kjo e vë sigurinë e udhëtarëve në rrezik”, u shpreh ajo.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.