Një tjetër zyrtar i lartë largohet nga Administrata e Donald Trump

Presidenti i SHBA, Donald Trump tha të dielën se Kryetari i Këshillit të Shtëpisë së Bardhë të Këshilltarëve Ekonomikë Kevin Hassett do të largohet “së shpejti” nga posti i tij, por nuk ofroi arsye për largimin e fundit të këtij niveli të lartë nga administrata e tij.

“Kevin Hassett, i cili ka bërë një punë kaq të madhe për mua dhe Administratën, do të largohet së shpejti. Zëvendësi i tij shumë i talentuar do të emërohet sapo të kthehem në SHBA,” tha Trump në një post në Twitter në natën e së dielës pasi fluturoi për në Europë për një sërë vizitash shtetërore.

Largimi i Hassett vjen në një kohë dramatike midis Shteteve të Bashkuara dhe disa prej partnerëve kryesorë tregtarë. Një luftë tregtare po krijohet midis Shteteve të Bashkuara dhe Kinës, ndërsa Trump është zotuar të imponojë tarifa ndëshkuese për të gjitha mallrat meksikane në një debat intensifikues mbi emigracionin. Trump falënderoi Hassett për punën e tij dhe e quajti atë një “mik të vërtetë” në postimin e Twitter të dielën. Ai nuk dha ndonjë indikacion se kush do të emërohet për të zëvendësuar Hassett.

Hassett është ndër të fundit në një linjë të gjatë të zyrtarëve të lartë të Shtëpisë së Bardhë dhe sekretarëve të kabinetit qeveritar që largohet nga administrata që kur Trump mori detyrën në janar 2017. Të tjerë që kanë dhënë dorëheqjen ose janë shkarkuar këtë vit, përfshijnë Sekretarin e Sigurisë së Atdheut, Kirsten Nielsen, drejtorin e komunikimit të Shtëpisë së Bardhë Bill Shine dhe shefin e Administratës së Biznesit të Vogël Linda McMahon.

Burimi: Reuters

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.