Një votë për Europën, një votë kundër ekstremistëve – Holanda rikonfirmon kryeministrin Rutte
Duket se premtimi i Geert Wilders për të sjellë një revolucion populist në Europë dështoi pa nisur ende. Tashmë që janë numëruar shumica e votave nga zgjedhjet e djeshme parlamentare, Partia për Liri duket se ka fituar vetëm 19 ndenjëse në parlament dhe ky rezultat mund të jetë edhe më i ulët.
Partia e kryeministrit Mark Rutte është në kryesim bindës dhe shtypi vendas këtë mëngjes është hapur me pyetjen se me kë mund të bëjë koalicion. Zgjedhja më natyrale në këtë aspekt duket të jetë partia Demokratët 66, të cilët po aq sa Wilders kanë arritur të fitojnë 19 ndenjëse, së bashku me Kristian Demokratët me të njëjtin numër deputetësh.
“Mesazhi ynë për Holandën, se do të ndjekim rrugën tonë dhe do ta mbajmë vendin të sigurt, të qëndrueshëm dhe të begatë u miratua nga populli”, tha Rutte përballë një turme me mbështetës të tij gjatë festës pas natës së zgjedhjeve.
Votat për partinë e kryeministrit, “Partia Popullore për Liri dhe Demokraci”, gjithsesi tregojnë një krizë ekzistencialiste të Holandës, pasi ka humbur 10 ndenjëse në krahasim me zgjedhjet e kaluara të 2012-ës.
Edhe social demokratët, të cilët janë aktualisht në koalicionin qeverisë kanë patur humbje të mëdha krahasuar me zgjedhjet e kaluara, duke siguruar vetëm 9 deputetë nga 38 në parlamentin aktual.
Fitorja e Rutte është përshëndetur edhe nga presidenti i Komisionit Europian Jean-Claude Juncker.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.