Njohja e Jerusalemit – Arabët, Europa dhe Kombet e Bashkuara kritikojnë vendimin e Trump
Njohja e Jerusalemit si kryeqytet të Izraelit nga Shtetet e Bashkuara është kritikuar nga Lindja e mesme, si një lëvizje trazuese në rajon, me palestinezët që thanë se Washingtoni po braktis rolin si ndërmjetës i paqes.
Bashkimi Europian dhe Kombet e Bashkuara kritikuan gjithashtu vendimin e Donald Trump për të zhvendosur ambasadën amerikane në Jerusalem.
Aletatët kryesor të Shteteve të Bashkuara ishin kundër përmbysjes së politikave të amerikës dhe ato ndërkombëtare që kanë zgjatur prej dekadash.
Franca e refuzoi vendimin e njëanshëm dhe bëri thirrje për qetësi në rajon. Britania deklaroi se vendimi nuk do të ndihmojë përpjekjet për paqe dhe se Jerusalemi duhet të ndahet nga Izraeli dhe një shtet i ardhshëm palestinez.
Gjermania deklaroi se statusi i Jeruzalemit mund të vendoset vetëm nëpërmjet një zgjidhjeje dyshtetërore.
Nga ana tjetër, Izraeli e mirëpriti lëvizjen e Donald Trump. Kryeministri i vendit, Benjamin Netanyahu tha se është një hap i rëndësishëm drejt paqes.
Ai shtoi se çdo dakordësi paqeje me Palestinezët duhet të përfshijë Jeruzalemin si kryeqytet të Izraelit dhe i bëri thirrje vendeve të tjera që të ndjekin shembullin e Donald Trump.
Trump përmbysi dekada të politikave të Shteteve të Bashkuara, duke kundërshtuar paralajmërimet në të gjithë botën se ky veprim do të përshkallëzojë konfliktin në Lindjen e Mesme.
Presidenti palestinez, Mahmoud Abbas, tha se Jeruzalemi është “kryeqyteti i përhershëm i Shtetit të Palestinës” dhe se me këtë lëvizje, Donald Turmp ka hequr rolin e Shteteve të Bashkuara si ndërmjetës të paqes.
Gjykata Mbretërore e Arabisë Saudite paralajmëroi për pasojat e rrezikshme të zhvendosjes së Ambasadës amerikane në Jerusalem.
Kreu i Organizatës së Kombeve të Bashkuara, Antonio Guterres tha se nuk ka alternativë tjetër përveç zgjidhjes dyshtetërore, duke kritikuar gjithashtu vendimin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.