Njohja e patentave shqiptare në Gjermani-Vjen në Shqipëri delegacioni gjerman. Nëse finalizohet, përfitojnë 30 mijë shqiptarë

Shqipëria dhe Gjermania kanë nisur zyrtarisht diskutimet për njohjen e ndërsjelltë të patentave. Nëse kjo finalizohet, përfitues janë rreth 30 mijë shqiptarë që jetojnë dhe punojnë në Gjermani. Drejtoria e Përgjithshme e Shërbimeve të Transportit Rrugor njofton se në Shqipëri ka mbërritur një delegacion gjerman për këtë çështje.

“Së bashku me Zv. Ministrin e Ministrisë së Infrastrukturës dhe Energjisë, Z. Artan Shkreli, mirëpritëm me kënaqësi të veçantë  Guido Zielke, Drejtor i Përgjithshëm i Trafikut Rrugor dhe Transportit dhe Znj. Renate Bartelt-Lehrfeld, Drejtoreshë e Ligjit të Trafikut Rrugor në Ministrinë Federale të Transportit në Berlin, vizitë e cila ka si qëllim informimin nga afër të palës gjermane me procesin e trajnimit dhe të testimit për marrjen e lejedrejtimit në Shqipëri.

Një takim i rëndësishëm me qëllim vijimin e vlerësimit të mëtejshëm të kërkesës së Republikës së Shqipërisë për njohjen e konvertimit të lejedrejtimeve shqiptare në Gjermani. Proces i cili ndihmon rreth 30,000 shqiptarë që jetojnë dhe punojnë në Gjermani.

I pranishëm në takim ishte dhe zv. Ambasadori gjerman, Z. Johannes Dietrich. Pala gjermane u njoh në terma të përgjithshme me investimet e ndërmarra nga DPSHTRR mbështetur nga MIE, për garantimin e kualifikimit dhe prodhimit të lejedrejtimit sipas parametrave të BE-së” njofton DPSHTRR.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.