Njohja e pensioneve/ Ministria e Financave njofton nisjen e raundit të parë të negociatave me një tjetër shtet të BE-së

Ministria e Financave njofton se ka nisur raundi i parë të negociatave për mbrojtjen shoqërore të shtetasve shqiptarë që punojnë e jetojnë në Bullgari dhe anasjelltas, të cilët do të përfitojnë nga marrëveshja që do të lidhet mes dy vendeve.

“Zëvendësministrja e Financave dhe Ekonomisë znj.Dajna Sorensen dhe drejtori i Institutit të Sigurimeve Shoqërore Astrit Hado janë duke zhvilluar në Sofie të Bullgarisë takimet e radhës me përfaqësuesit e institucioneve përkatëse. Pjesë e diskutimeve mes të dyja palëve është dhe fusha e mbrojtjes sociale” njofton Ministria e Financave.

Vetëm pak kohë më parë Kuvendi ratifikoi marrëveshjen për njohjen e ndërsjelltë të pensioneve me Kanadanë, nga e cila përfitojnë rreth 70,000 shtetas shqiptarë.

Pak ditë më parë, kryeministri shqiptar njoftoi se është pranë arritjes edhe marrëveshja për njohjen e ndërsjelltë të pensioneve më Italinë.

Deri tani janë nënshkruar 12 marrëveshje që i japin mundësi emigrantëve, të cilët kanë ndarë vitet e punës mes Shqipërisë dhe një vendi tjetër të mos humbasin kontributet e derdhura.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.