“Nord Stream 2” nis punën në tetor – Pritet të transportojë 5.6 miliardë metër kub gaz nga Rusia drejt Europës
Gazsjellësi “Nord Stream 2”, që aktualisht është drejt përfundimit, parashikohet të transportojë rreth 5.6 miliardë metër kub gaz nga Rusia drejt Europës, gjatë këtij viti. Njoftimi u bë nga kompania shtetërore ruse e gazit, Gazprom.
Projekti që ka kushtuar plot 11 miliardë dollarë është ndërtuar për të anashkaluar Ukrainën, që cilësohet si armiku politik i Rusisë. Ky gazsjellës ka qënë një pikë e fortë e tensioneve mes Uashingtonit dhe Moskës gjatë viteve të fundit, për shkak të frikës se mund të përdoret nga Rusia për si një armë presioni ndaj Europës.
Ndërtimi i gazsjellësit nënujor, që transporton gaz nga Rusia drejtpërdrejt në Gjermani, është penguar nga sanksionet e Shteteve të Bashkuara në fund të vitit 2019, nga tensionet politike dhe nga planet e Uashingtonit për të shitur gazin e saj natyror në Europë. Megjithatë, “Nord Stream 2” është 99% i përfunduar dhe kompania operuese me bazë në Zvicër deklaroi se po punohet për pjesën finale të projektit.
Tashmë, pikëpyetja kryesore për Ukrainën është se si Rusia do të transportojë gazin e saj drejt Europës, kur marrëveshja aktuale e tranzitit mes Kievit dhe Moskës të skadojë në vitin 2024. Dmitry Marinchenko, një drejtor i lartë pranë agjencisë Fitch, shprehet se Rusia nuk do të jetë në gjendje të shmangë plotësisht tranzitin nga Ukraina nëse rregullat europiane zbatohen për “Nord Stream 1” dhe “Nord Stream 2”.
Gazprom do të jetë në gjendje të transportojë 5.6 miliardë metër kub gaz nëse “Nord Stream 2” fillon operacionet në tetor. Tregu europian i gazit po pret me padurim prurjet ruse përmes këtij gazsjellësi. Sipas statistikave të Bashkimit Europian, konsumi i gazit në Bashkimin Europian gjatë vitit të kaluar ishte në rreth 394 miliardë metër kub gaz. Çmimet europiane të gazit kanë prekur nivele rekord, për shkak të furnizimit të ulët, rënies së rezervave në nivele rekord dhe kapacitetit të ulët që ofron Rusia në ankande.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.