Nordhaus, Romer fitojnë Nobel – Përfshijnë klimën dhe inovacionin në analizë ekonomike

Ekonomistët amerikanë, William Nordhaus dhe Paul Romer, kanë fituar çmimin Nobel për ekonominë 2018,  për përfshirjen e ndryshimit klimatik dhe inovacionit teknologjik në analizë ekonomike.

William  Nordhaus, hulumtues në universitetin Yale, është personi i parë që ka krijuar një model sasior që përshkruan ndërlidhjen mes ekonomisë dhe klimës,  sipas Akademisë së Shkencave në Suedi.

Paul Romer, hulumtues në universitetin e biznesit në New York, ka treguar se si forcat ekonomike drejtojnë gatishmërinë e firmave për të prodhuar ide të reja dhe inovacione, duke krijuar një model të ri për zhvillimin, i njohur si “Teoria e rritjes endogjene”.

“Zbulimet e tyre kanë zgjeruar horizontin e analizës ekonomike, duke ndërtuar modele që shpjegojnë se si ekonomia e tregut ndërvepron me natyrën dhe dijen”, deklaroi Akademia në Suedi.

Çmimi për ekonomi, që vlen 9 milionë krona suedeze, apo 1 milionë dollarë, është themeluar në vitin 1968.

Ky nuk ka qenë pjesë e grupit origjinal prej 5 çmimesh,  të caktuar në vullnetin e industrialistit suedez, Alfred Nobel në 1895-ën.

“Fituesit e këtij viti nuk kanë sjellë përgjigje përfundimtare,  por punimet e tyre na kanë sjellë pranë zbulimit të një mënyrë se si mund të arrijmë një rritje ekonomike globale të qëndrueshme”, deklaroi Akademia.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.