Nordikët japin shembuj suksesi, Andersson: Duhen taksa më të larta dhe rishpërndarje të ardhurash
Magdalena Andersson, ministrja e Financave e Suedisë, thotë se taksat e larta, sindikatat e forta dhe shpërndarja e barabartë e pasurisë, përbëjnë recetën për sukses.
Ajo ka rritur taksat dhe shpenzimet në mirëqenie që prej vitit 2014, kur erdhi në pushtet dhe ka parashikuar një fuqizim të ekonomisë, ndërkohë që norma e rritjes së vendit shënoi 4% në fillim të vitit të kaluar.
Sipas ministres, në një botë që bart ende pasojat e krizës financiare të 2008-ës, ndjekur nga vala populiste më vonë, administrimi i ekonomisë nga Suedia përbën një model për të ndjekur. Andersson thotë se suksesi lidhet me tre elementë: vendet e punës, mirëqenia dhe rishpërndarja e të ardhurave.
Ky model është komplet i kundërt me politikat që po zhvillohen në perëndim, ku Presidenti i Shteteve të Bashkuara synon që nëpërmjet uljes së taksave dhe barrës rregullatore, të arrijë një rritje me 3% të ekonomisë. Në Europë, ky model po fillon të tërheqë vëmendjen.
Emmanuel Macron, që fitoi zgjedhjet ditën e Dielë, ka bërë thirrje që Franca të ndjekë vendet Nordike për mënyrën e organizimit të shoqërisë. Andersson shton se rishpërndarja e të ardhurave përbën një mbrojtje ndaj populizmit.
Suedia ka një ndër barrat më të larta tatimore në botë, me të ardhurat nga taksat në rreth 43% të Produktit të Brendshëm Bruto, sipas të dhënave të OECD.
Kjo shifër qëndron në 26% në Shtetet e Bashkuara. Ekonomia e Suedisë është rritur me 3.1% në vitin e kaluar, krahasuar me 1.6% rritje në SHBA. Suedia ka pjesëmarrjen më të lartë fuqisë punëtore në Bashkimin Europian.
Në kontrast me homologët europianë, Suedia rezulton në sufiçite buxhetorë. Vendi ka një këndvështrim më pragmatik mbi kapitalizmin, duke i lejuar bizneset që të dështojnë nëse nuk konkurrojnë dot. (e kundërta e “too big to fail”).
“Në Suedi, është e pranueshme që shoqëria të ndryshojë dhe që disa kompani të zgjerohen e të tjera të tkurren”, tha ministrja, duke shtuar se gjatë këtij tranzicioni duhen politika aktive të punësimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.