Noterët, jotransparentë e informalë! Konkurrenca: Është shkelur ligji për numrin e tyre, të mos luajnë me çmimet
Një analizë e Autoritetit të Konkurrencës mbi shërbimin noterial në vend nxjerr në pah një seri problemesh.
Ato nisin nga shkelja e ligjit që nuk lejon më shumë se 1 noter për 15 mijë banorë, te mungesa e akteve nënligjore që rregullojnë këtë profesion, te mungesa e transparencës, te konkurrenca e pandershme mes noterëve.
Autoriteti konstaton se numri i noterëve që ushtrojnë noterinë në Shqipëri është më i madh se sa 1 në 15 000 siç e përcakton ligji. Numri i përgjithshëm i noterëve që ushtrojnë veprimtarinë e tyre në territorin e Republikës së Shqipërisë duhet të jetë në përpjesëtim të arsyeshëm me numrin e përgjithshëm të popullsisë. Aktualisht në Shqipëri bazuar në nenin 142 të ligjit është pezulluar dhënia e licencave të reja për noter derisa të arrihet raporti midis numrit të përgjithshëm të noterëve dhe popullsisë siç përcaktohet në nenin 10 (1 noter për 15 000 banor rezidentë).
“Konstatohet se shërbimi i noterisë bazuar në ligjin e ri duhet të dixhitalizohet, dhe çdo veprim noterial do të regjistrohet automatikisht duke sjellë transparencë, kontroll me të detajuar dhe mungesë të informalitetit.
Ky sistem gjithashtu do të lehtësojë komunikimin midis noterëve në Shqipëri por edhe më gjerë, dhe do të shmangë problemet e deritanishme më konkurrencën e pandershme midis noterëve, ku evidentoheshin raste të praktikave noteriale të cilat nuk regjistroheshin fare, kryheshin poshtë niveleve të fiksuara të tarifave të përcaktuara duke sjellë si konkluzion edhe mungesën e kontrollit dhe të mbikëqyrjes së këtyre veprimeve”, thekson në analizë Autoriteti i Konkurrencës.
Është e vërtetë që ka një informacion asimetrik midis ofruesve të shërbimit që janë noterët dhe marrësve të shërbimit, konsumatorët, të cilët duhet të jenë më tepër të informuar lidhur me të drejtat e tyre, thekson Autoriteti i Konkurrencës.
Duhet të ketë një transparencë dhe informim në lidhje me shërbimet e ofruara pasi behet fjalë për shërbime të cilat kërkojnë një nivel të caktuar ekspertize, për të cilat konsumatorët nuk kanë nivelet e duhura të njohurive.
Në çdo rast, duke qenë se behet fjalë për shërbime dhe të mira të besueshme, krijohet një marrëdhënie mirëbesimi midis ofruesit të shërbimeve dhe konsumatorëve, ku secili ka nivelin e vet të përgjegjësisë, konkludon analiza.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.