Nuk di të përdorë kompjuter – Ministri i Kibernetikës dhe Lojërave Olimpike bën kontradiktë me postin
Ministri i sigurisë kibernetike në Japoni, Yoshitaka Sakurada, ka thënë se nuk di të përdorë kompjuter, pavarësisht se ka një kompjuter në zyrë. 68-vjeçari është përgjegjës për mbikëqyrjen e përgatitjeve të lojërave Olimpike të vitit 2020 në Tokjo dhe komentet e tij në një komision parlamentar, ku pohoi se nuk ka përdorur ndonjëherë kompjuter, kanë shtuar shqetësimet mbi përgatitjen e Japonisë për eventin sportiv botëror.
“Kam qenë i pavarur që nga mosha 25 vjeçare dhe kam drejtuar stafin tim dhe sekretarët që ta bëjnë këtë punë. Unë nuk kam përdorur kurrë kompjuter. Për ata që e përdorin, i udhëzoj gjithnjë që të marrin masa sigurie.” Në një konferencë, Sakurada u përpoq të qartësojë komentet e tij duke thënë se përdor kompjuter në punë.
“Unë nuk përdor kompjuter në shtëpi për çështjet e përditshme, por në zyrë, sigurisht që e përdor për punë të ndryshme.” Sakurada u emërua në të dy postet, ministër i kibernetikës dhe mbikëqyrës i lojërave Olimpike, në muajin e kaluar nga Kryeministri Shinzo Abe dhe nuk kishte mbajtur ndonjëherë pozicion në kabinet gjatë 22 viteve në parlament. Në një komision tjetër parlamentar, ministri ngatërroi koston e lojërave Olimpike, duke thënë 1,500 jen, në vend të 150 miliardë jen, që janë ekuivalent me 1.32 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.