“Nuk është koha për dozë të 3-të” / Ish-shefi i FDA thotë se nuk ka prova që regjimi me 2 doza ka dështuar
Zyrtarët në Shtetet e Bashkuara kanë thënë se nuk ka mjaftueshëm prova momentalisht për të vërtetuar se nevojiten doza nxitëse për vaksinat Covid. Norman Baylor, ish drejtori i zyrës për vaksinat tek Administrata e Barnave dhe Ushqimeve, tha se përgatitja për to është pozitive, por nuk ka prova, të paktën në Shtetet e Bashkuara, të dështimit të vaksinave apo zbehjes së imunitetit, në mënyrë që të nevojitet doza e tretë nxitëse. Firma farmaceutike Pfzier po zhvillon një dozë të rretë nxitëse, për të shënjestruar variantin tejet të transmetueshëm Delta, që është bërë mbizotëruesi në shumë vende, përfshirë SHBA.
Qendrat për Kontrollin dhe Parandalimin e Sëmundjeve dhe Administrata e Barnave, theksuan në javën e kaluar se amerikanët që kanë marrë 2 doza, nuk kanë momentalisht nevojë për një të tretë. Pfizer dhe Biontech vunë në dukje të dhëna nga ministria e shëndetësisë në Izrael, se ka patur rënie të efektshmërisë së vaksinës, në parandalimin e infeksionit. Rënia e efikasitetit përkoi me përhapjen e variantit delta dhe përfundimit të masave anti-Covid në Izrael. Megjithatë, vaksina qëndron 93% efektive në parandalimin e shtrimit në spital. Baylor, tha se monitorimi nuk ka treguar ndonjë dështim të dukshëm të vaksinës deri më tani. Rastet me Covid po rriten në SHBA, por mjekët thonë se kjo vjen nga varianti delta që po përhapet tek popullsia e pavaksinuar.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.