Nuk ka negociata përpara 2020-ës – Edhe nëse përmbushen kriteret ka shumë hallka për të kaluar
Në rastin më të mirë, Shqipëria nuk do të mund të çelë dot zyrtarisht bisedimet me Bashkimin European për t`u anëtarësuar, përpara vitit 2020. Këtë gjë e thotë vetë Këshilli i Bashkimit Europian në deklaratën e fundit për rajonin, që ka shkaktuar shumë debate, jo vetëm në Shqipëri por edhe më gjerë në Europë.
“Këshilli kujton se, vendimi për të hapur negociatat me Shqipërinë do të jetë subjekt i miratimit nga parlamentet kombëtare, si dhe miratimit nga Këshilli Europian, ndërkohë që më pas do të ndiqet nga konferenca e parë ndërqeveritare në fund të vitit 2019, në varësi të progresit të bërë”-thotë në deklaratë këshilli.
Kjo do të thotë se, edhe në rast se kriteret e vendosura nga këshilli për të përmbushur brenda Qershorit të vitit të ardhshëm, do të arrihen, negociatat nuk do të fillojnë dot përpara 2020-ës. Dhe ky rrugëtim nuk duket aspak i lehtë, pasi këto kritere kërkojnë një sforco mjaft të madhe.
Kriteri i parë ka të bëjë me procesin e vettingut, ose më saktë me përfundimin e të gjitha dosjeve prioritare. Bëhet fjalë për plot 57 dosje, nga të cilat rreth 10 prej tyre kanë kaluar në sitën e vettingut deri më tani, çka tregon mjaft mirë se në 12 muaj kërkohet një punë kolosale.
Kriteri i dytë i referohet krijimit të SPAK dhe Byrosë Kombëtare të Hetimit. Edhe ky duket se do të jetë një kriter shumë i vështirë për t`u arritur, edhe për faktin se lidhet ngushtë me kriterin e parë.
Kriteri i tretë ndërkohë është rrjedhojë e dy të parëve. Këshilli kërkon nga Shqipëria që të forcojë hetimet dhe të rrisë numrin e dënimeve për korrupsion dhe krimin e organizuar, përfshirë të akuzuarit në nivele të larta.
Paçka se, këshilli tenton ta nxjerrë si diçka pozitive shtyrjen për në Qershor të vendimit, kriteret e sipërpërmendura tregojnë se, rruga nuk është aspak e thjeshtë dhe se 1 vit është pak kohë në dispozicion.
Këshilli kërkon gjithashtu nga komisioni Europian që të rrisë monitorimin ndaj Shqipërisë, duke raportuar më shpesh për progresin në këto kritere, por edhe në kriteret e tjera të radhitura në rekomandimin e Komisionit Europian.
Veç Komisionit Europian, edhe qeveria sëbashku e faktorë të tjerë si Ambasada Amerikane në Shqipëri e kanë shpallur si fitore vendimin e këshillit, duke përgëzuar Shqipërinë, për atë që e konsiderojnë si arritje. Nga krahu tjetër, opozita e ka cilësuar si një dështim të qeverisë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.