Nuk ndryshojnë kostot e ndërtimit -“Ngrijnë” në tremujorin e tretë të vitit!

Kostot e ndërtimit të banesave në Shqipëri janë pothuajse të ngrira. Sipas të dhënave nga Instituti i Statistikave, në tremujorin e tretë të vitit, indeksi që mat këto kosto u rrit me vetëm 0.1% me bazë vjetore. Kjo normë ishte edhe më e ulët se rritja me 0.3% e tremujorit të dytë, ndërsa ka prekur nivelet më të ulëta që prej vitit 2016. Që nga mesi i vitit 2016, kostot e ndërtimit iu rikthyen rritjes, por kjo rritje ka qenë në nivele të papërfillshme për të ushtruar presione për rritje të çmimeve të banesave nga krahu i ofertës. Sipas të dhënave më të fundit të disponueshme nga Entit i Banesave, kosto e ndërtimit në Shqipëri është rreth 270 euro për m2 sipërfaqe ndërtimi ose afërisht 320 euro për m2 sipërfaqe të shfrytëzuar, me diferenca të vogla mes bashkive të ndryshme. Çmimi mesatar i shitjes së banesave në kryeqytet vlerësohet se rreth dy herë e gjysmë kostoja për sipërfaqe shfrytëzimi ose rreth tre herë sa kostoja e llogaritur për sipërfaqe ndërtimi.

Në tremujorin e tretë të këtij viti, rritja e lehtë erdhi sidomos nga shpenzimet e shtuara për paga dhe kostot më të larta të makinerive. Shpenzimet e bizneseve ndërtuese për fondin e pagave u rritën me 1.2%, ndërsa shpenzimet e makinerive me 0.7%.

Rritja e kostove për paga dhe makineri, megjithatë, edhe në tremujorin e tretë u balancua nga rënia e kostove për shpenzimet materiale, që përbëjnë edhe zërin me peshën kryesore në aktivitetin ndërtues. Kostot e shpenzimeve materiale ranë me 0.1% krahasuar me një vit më parë. Çmimet më të ulëta të karburantit gjatë këtij viti kanë bërë që edhe kostot e transportit të bien me 1.6 % ndaj tremujorit të tretë 2018. Aktiviteti i ndërtimit po rritet në vitet e fundit, çka provohet nga ecuria e lejeve të ndërtimit. Për 9-mujorin e këtij viti janë dhanë 848 leje për ndërtesa të reja, ndërsa vitin e kaluar ishin dhënë pothuajse 1200 leje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.