Numri më i ulët i aksidenteve rrugore? Instat: Ja cili është qarku më ‘i ndërgjegjshëm’
Viti 2019 rezulton të ketë ‘ndërgjegjësuar’ qarkun e Dibrës, i cili ka ulur ndjeshëm numrin e aksidenteve për këtë 8 mujor (janar- gusht). Sipas publikimit më të fundit të Instat për aksidentet rrugore, gjatë kësaj periudhe në qarkun e Dibrës janë shënuar 8 aksidente rrugore, ndërkohë që për janar- gusht 2018, ky numër ishte 24.
Po ashtu, në këtë pjesë të vitit, qarku i Dibrës mban numrin më të ulët të aksidenteve rrugore, ndërkohë që në 8 mujorin e vitit 2018, numrin më të ulët e mbante qarku i Kukësit. E nëse qarku i Dibrës ka bërë progres gjatë 2019-ës, ai i Kukësit ka rritur ndjeshëm numrin e aksidenteve rrugore. Referuar Instat, në janar- gusht 2018, qarku i Kukësit ka pasur 12 aksidente rrugore gjithsej, ndërkohë që për të njëjtën periudhë të vitit 2019, ky numër ka arritur në 25.
Nga ana tjetër, qarku i Tiranës, duke qenë dhe qarku më i populluar, mban edhe riskun më të lartë të aksidenteve rrugore. Sipas Instat, ka qenë dhe vazhdon të jetë në vendin e parë përsa I përket aksidenteve rrugore. Megjithatë, ajo që vlen për t’u përmendur është se nga janar- gusht 2018, në janar- gusht 2019, ky numër ka zbritur nga 491 në 425, me një rënie afro 14%. Po ashtu, referuar Instat, edhe qarku i Durrësit ka ulur numrin e aksidenteve rrugore në 8 mujorin e këtij viti, duke zbritur numrin në 83, nga 153 që ishte në janar- gusht 2018.
Po ashtu, qarku i Shkodrës, ai i Elbasanit, i Vlorës dhe i Beratit, kanë numëruar më pak aksidente në 8 mujorin e vitit 2019, krahasuar me të njëjtën periudhë të vitit paraardhës. Referuar Instat, e kundërta ka ndodhur me qarkun e Fierit, Korçës, Gjirokastrës dhe Lezhës. Kjo e fundit, po ashtu, mban vendin e parë për janar- gusht 2019, me 111 aksidente rrugore, pas qarkut të Tiranës, siç është lartpërmendur.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.