Nxënësit, përballë COVID-19 – Udhëzimi i Ministrisë së Arsimit, 3 skenarët për hapjen e shkollave
Thuajse dy javë përpara nisjes së vitit të ri shkollor për nxënësit e arsimit parauniversitar, Ministria e Arsimit ka publikuar udhëzuesin se si do të funksionojë hapja e shkollave, masat që duhet të marrin nxënësit dhe si do procedohet në rastet kur konstatohen raste infektimesh. Udhëzuesi parashikon 3 skenarë kryesorë për zhvillimin e procesit mësimor, mësim në shkollë; mësim i kombinuar (në shtëpi dhe në shkollë); mësim në kushtet e shtëpisë (online). Sipas dokumentit, skenarët do të zbatohen në varësi të infrastrukturës së shkollave, të numrit të nxënësve dhe të përhapjes së virusit.
Kështu mund të ndodhë që brenda një qyteti të ketë një shkollë që e zhvillon procesin mësimor normalisht dhe një shkollë që zbaton mësimin e kombinuar (shkollë dhe shtëpi), siç mund të ndodhë që një shkollë ta nisë procesin mësimor normalisht dhe më pas të vijojë me mësimin në kushtet e shtëpisë për shkak të përhapjes së virusit. Në bazë të madhësisë së klasave Ministria e Arsimit parashikon ndarjen e tyre në turne apo shkurtimin e orëve të mësimit me qëllim që të ndiqet protokolli i Ministrisë së Shëndetësisë për frenimin e përhapjes së COVID-19.
Nga ana tjetër nxënësit duhet të paraqiten në shkollë në orarin e përcaktuar, të ruajnë distancën 2 m nga njëri tjetri, nuk do të lejohen të dalin nga godina dhe të kthehen përsëri, ndërsa stafi i shkollës do të bëjë matjen e temperaturës, sprucimin me alkol të duarve etj. Në rast kur konstatohen infektime do të merren masa për karantinimin e nxënësve, të klasave ku marri pjesë nxënësit dhe të kontakteve të afërta.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.