Nxitja e kreditimit- Ekspertët: ”Është thelbësore të rritet përfshirja financiare”
Në fillim të kësaj jave, Banka e Shqipërisë prezantoi platformën për rigjallërimin e kreditimit të ekonomisë. Platforma e përgatitur në bashkëpunim me Shoqatën Shqiptare të Bankave, përbëhet nga 10 objektiva, përmbushja e të cilave besohet se mund t’i japin më shumë impuls aktivitetit kreditues në vend. Eksperti i tregut financiar, Elvin Meka, thotë në një intervistë për Televizionin Scan se platforma përfaqëson një nismë të rëndësishme, si përpjekja e parë për të nxitur rritjen e kreditimit të ekonomisë përmes disa propozimeve konkrete.
Zoti Meka megjithatë thekson se objektivat më të rëndësishme që përmban platforma e rigjallërimit të kreditimit janë ato afatgjata. Ai vendos theksin te nevoja për të rritur edukimin dhe përfshirjen financiare të shqiptarëve. Studimet kanë treguar se janë rreth 1 milion shqiptarë që ende nuk janë klientë të sistemit bankar dhe që nuk marrin ende produkte dhe shërbime financiare.
Platforma për gjallërimin e kreditimit ndërthur disa masa të lidhura me ndryshimin e akteve rregullative të Bankës së Shqipërisë, me të tjera që kërkojnë një përfshirje më të gjerë palësh interesi, por edhe një vullnet të fortë politik. Përcaktimi i sektorëve strategjikë për t’u mbështetur dhe stimuluar, rritja e përfshirjes financiare, ulja e përdorimit të cash-it dhe e euroizimit të ekonomisë janë të gjitha objektiva që kërkojnë masa konkrete nga Qeveria dhe Kuvendi.– thekson ai.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.