Objektivat e Societe Generale – Do të shkurtojë 15% të degëve në Francë, prioritet bankingut dixhital
Huadhënësi francez, Societe Generale, duke synuar rikthimin në rritje dhe përfitueshmëri, do të shkurtojë vende pune në Francë dhe do të shtojë zëra të jashtëzakonshëm prej 570 milionë euro në rezultatin e tremujorit të katërt. Rreth 900 shkurtime do të ndërmerren në njësinë e bankingut retail në Francë, deklaroi Societe Generale. Kjo vjen shtesë 2,550 pozicioneve që banka ka thënë prej kohësh që do të eliminojë.
Shpenzimet e papritura u lajmëruan menjëherë pasi Kreu ekzekutiv i bankës, Frederic Oudea, prezantoi serinë e tretë të objektivave financiarë që prej krizës globale financiare drejt investitorëve. Ai po synon që një shtysë në investimet në teknologji dhe bankingun në aparatet celularë, do të nxisë të ardhurat dhe përfitueshmërinë. Objektivat e rinj parashikojnë një rritje progresive të dividentit dhe përmirësim të përfitueshmërisë nëpërmjet menaxhimit të ashpër të rreziqeve të tregut.
Aksionet e bankës u rritën me 1% në nisje të tregtisë europiane. Megjithatë, deri më tani për vitin, vlera në treg e Societe Generale ka rënë me 7.4%, në një total prej 35 miliardë euro. Banka synon të gjenerojë 3.6 miliardë euro të ardhura shtesë brenda tre vitesh ndërkohë që i jep prioritet klientëve kryesorë dhe lajmëroi gjithashtu se do të reduktojë 15% të degëve në Francë.
Ndër objektivat e lajmëruara ishin: një normë e përbërë e rritjes prej sipër 3%, kostot deri në 2020 në 17.8 miliardë euro, normë e mjaftueshmërisë së kapitalit sipër 12%, normën e levës financiare në 4-4.5% si dhe rritjen e të ardhurave për aksion (EPS) në rreth 6.5 euro deri në 2020.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.