Objektivi i “300 mijë vendeve” – Numri i të punësuarve është shtuar me 142 mijë
Një nga premtimet më të rëndësishme të qeverisë në programin e vitit 2013 ishte krijimi i 300 mijë vendeve të reja të punës. Megjithëse në vitet e fundit statistikat zyrtare tregojnë një përmirësim të ndjeshëm në treguesit e punësimit dhe papunësisë, përmbushja e plotë e premtimit është shumë larg.
Sipas të dhënave nga Instituti i Statistikave, në fund të vitit të kaluar, numri total i të punësuarve në ekonominë shqiptare ishte 1 milion e 167 mijë. Krahasuar me tremujorin e dytë të vitit 2013, që përkon me zhvillimin e zgjedhjeve të përgjithshme, numri i të punësuarve, sipas INSTAT është rritur me rreth 143 mijë vetë. Pra, nga 300 mijë vendet e punës të premtuara, në tre vjet e gjysmë janë shtuar më pak se gjysma.
Shkalla e papunësisë në fund të vitit të kaluar ishte 14.2%, nga 16% që raportohej në tremujorin e dytë 2013, por, numri i të papunëve ka pësuar një ndryshim shumë modest. Nëse në tremujorin e dytë 2013 INSTAT raportonte 194 mijë të papunë, në fund të vitit të kaluar numri i të papunëve ishte rreth 192 mijë.
Në këtë kuptim, qeveria mund të reklamojë si arritje faktin që, megjithë zgjerimin e forcës së punës, numri i të papunëve ka ngelur pothuajse i pandryshuar krahasuar me vitin 2013. E thënë ndryshe, ulja e shkallës së papunësisë gjatë këtyre viteve ka ardhur nga rritja e forcës aktive të punës, por jo nga ulja e numrit të të papunëve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.