Obligacionet në euro – Nis tregtimi në Bursën Shqiptare të Titujve

Bursa Shqiptare e Titujve njoftoi këtë javë shlyerjen e suksesshme të një transaksioni për letra me vlerë në monedhën euro. Sipas njoftimit të ALSE, transaksioni është kryer në obligacionet thesari të qeverisë shqiptare.

Në transaksionin e parë në euro, u tregtuan gjithsej 96 obligacione, për një vlerë totale prej rreth 96 mijë eurosh. Qeveria shqiptare ka sasi të konsiderueshme obligacionesh në euro, të emetuara në tregun e brendshëm financiar. Që prej kësaj jave, edhe këto instrumente mund të tregtohen në Bursën Shqiptare të Titujve.

ALSE fton publikisht investitorët e interesuar t’i drejtohen brokerave anëtarë të bursës për të kryer transaksione me këto tituj. Aktualisht, Bursa numëron katër anëtarë, të gjitha banka tregtare me përvojë, si Credins Bank, Tirana Bank, ABI Bank dhe Banka Ndërkombëtare Tregtare.

Bursa Shqiptare e Titujve u licencua vitin e kaluar dhe u bë tregu i parë funksional i titujve në historinë e vendit. Për momentin, bursa është e licencuar vetëm për tregtimin titujve të qeverisë, ndërsa pritet edhe drita e gjelbër e AMF-së për të lejuar tregtimin e titujve të shoqërive tregtare.

Prej disa vitesh, në tregun financiar po aplikohet me sukses emetimi i obligacioneve me ofertë private, çka përbën një potencial të prekshëm për zhvillimin e mëtejshëm të bursës.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.