OBSH, kundër dozave mbështetëse: “Këto vaksina duhet të shkojnë për vendet e varfëra”
Zyrtarët e Organizatës Botërore të Shëndetësisë kanë bërë thirrje që vendet e pasura të mos injektojnë aktualisht dozën e tretë të vaksinave kundër Covid-19 dhe këto doza të shkojnë për vendet e varfëra, që janë ende në pritje të fazës së parë të mbrojtjes.
Duke folur në konferencën javore për mediat, Bruce Aylward, këshilltari i lartë i Drejtorit të Përgjithshëm të OBSH-së, deklaroi se ka mjaftueshëm vaksina në botë, por nuk po shkojnë në destinacionin e duhur sipas radhës së duhur. OBSH bëri thirrje që vendet që aktualisht po synojnë injektimin e dozës së tretë duhet t’i pezullojnë këto plane dhe vaksinat t’i kanalizojnë në vendet e varfëra që ende nuk kanë siguruar dozën e parë për njerëzit e tyre, sidomos për punonjësit e shëndetësisë dhe personat me rrezik të lartë të infektimit.
Pak momente përpara thirrjes së OBSH-së, Shtetet e Bashkuara të Amerikës njoftuan planin për të filluar shpërndarjen e dozës së tretë në fund të shtatorit, në përpjekje për të ulur kurbën e infektimeve me variantin Delta. Nëse vendet me të ardhura të larta vendosin të ofrojnë një dozë të tretë për personat mbi 50 vjeç, atëherë do të nevojitet një shtesë prej 1 miliardë doza.
OBSH sugjeron se injektimi i dozave mbështetesë mund të zëvëndësohet me masa të tjera, siç është mbajtja e maskës, sidomos të vendet me norma të larta të vaksinimit.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.