OBSH paralajmëron për përzierjen e vaksinave / “Nuk duhet bërë nga individi. Vendimi i takon autoriteteve të shëndetit”

Organizata Botërore e Shëndetësisë ka këshilluar individët që të mos përziejnë vaksina të Covid-19 nga prodhues të ndryshëm, duke theksuar se këto vendime i duhen lënë autoriteteve të shëndetit publik.  Shefja shkencëtare e organizatës, Soumya Swaminathan tha se kjo përbën një trend të rrezikshëm. “Do të jetë një situatë kaotike nëse qytetarët nisin të vendosin se kur do të marrin një dozë të dytë, tretë apo të katërt”- tha ajo.    Sipas saj, individët nuk duhet të vendosin për veten, por të dëgjojnë agjencitë e shëndetit publik, bazuar në të dhënat e disponueshme. “Të dhënat nga studimet e përzierjes së vaksinave të ndryshme ndodhen në pritje dhe duhen vlerësuar siguria dhe imunogjeniteti”- shkroi Swaminathan në Twitter.  Eksperti i këshilluesve strategjik i OBSH, theksoi në Qershoir se vaksina e Pfizer mund të përdoret së shpejti si një dozë e dytë, pas një fillestare me AstraZeneca, nëse kjo e fundit nuk do disponohet.  Një provë klinike e drejtuar nga universiteti i Oksfordit ndodhet në zhvillim, për të hetuar përzierjen e regjimit të AstraZeneca dhe Pfizer.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.