OBSH: Varianti i ri I.H.U. i gjetur në Francë nuk është shqetësues!

Organizata Botërore e Shëndetësisë thotë se është duke monitoruar një variant të koronavirusit të zbuluar në një numër të vogël pacientësh në Francë, por që, për momentin, ka pak arsye për t’u shqetësuar për përhapjen e tij. Varianti B.1.640.2 u identifikua për herë të parë në tetor dhe u ngarkua në Gisaid, një bazë të dhënash për variantet e sëmundjeve, më 4 nëntor. Vetëm rreth 20 mostra janë renditur deri më tani, thanë ekspertët këtë javë dhe vetëm një që nga fillimi i dhjetorit.

Në të kundërt, varianti Omicron, i cili u ngarkua për herë të parë në Gisaid më 23 nëntor, ka më shumë se 120,000 sekuenca në bazën e të dhënave. Ai është zbuluar në të paktën 128 vende, sipas OBSH, dhe po nxit numra rekord të rasteve në shumë pjesë të botës.

Shqetësimet për variantin në Francë u ngritën pasi studiuesit zbuluan se ai përmbante 46 mutacione që ndryshonin nga versioni origjinal i koronavirusit. Omicron gjithashtu ka një numër të lartë mutacionesh, të cilat studiuesit besojnë se e bëjnë atë shumë më të transmetueshëm.

Sipas një punimi kërkimor që u botua në një server preprint në fund të dhjetorit, por që nuk është rishikuar nga kolegët, varianti B.1.640.2 u zbulua për herë të parë në Francën juglindore në një person të vaksinuar që kishte udhëtuar së fundmi nga Kameruni. Studiuesit gjetën gjithsej 12 raste në zonë dhe e quajtën variantin “I.H.U.”, sipas institutit kërkimor në Marsejë që ndihmoi në identifikimin e tij.

Variante të shumta të koronavirusit janë shfaqur gjatë dy viteve të fundit dhe arsyet që disa përhapen gjerësisht ndërsa të tjerët jo janë komplekse. Tani për tani, disa studiues të pavarur thonë se ka pak arsye për t’u shqetësuar në lidhje me variantin I.H.U. Tom Peacock, një virolog në Kolegjin Imperial në Londër, postoi këtë javë në Twitter se, deri më tani, “ky virus ka pasur një shans të mirë për të shkaktuar telashe, por kurrë nuk është materializuar me të vërtetë”.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.