OECD për Japoninë – Thekson rreziqet pas përfundimit të lehtësimit monetar
Organizata për Zhvillim dhe Bashkëpunim Ekonomik bëri të ditur se Banka e Japonisë duhet të mbajë programin e lehtësimit sasior deri sa inflacioni të tejkalojë objektivin, megjithatë theksoi për kujdes nga rreziqet në çmimin e aktiveve dhe sektorin financiar.
OECD rriti projeksionet për ekonominë e tretë më të madhe në botë në 1.2% për 2017-ën, prej përshpejtimit të shpenzimeve konsumatore, rritjes së eksporteve dhe shpenzimeve kapitale (Capex).
Megjithatë, organizata me seli në Paris deklaroi se ekonomia do të ngadalësohet në një normë prej 0.8% në 2018-ën.
Në vlerësimin e fundit, OECD tregon se Japonia duhet të rrisë më tej pagën minimale dhe të përmirësojë produktivitetin në ndërmarrjet e vogla dhe të mesme.
“Prioritet do të jetë arritja e inflacionit në 2%, ndërsa monitorohen kostot dhe efektet anësore”, nënvizon Organizata.
Banka e Japonisë ka caktuar një normë negative të interesit prej 0.1% në një porcion të rezervave të tepërta që bankat tregtare mbajnë te ajo qendrore. Institucioni blen gjithashtu borxh qeveritar, në mënyrë që të mbajë yieldin e titujve 10-vjeçar të borxhit afër zeros, dhe investon në fonde të listuara në bursë (ETFs) për të ulur primet e rrezikut.
Zotërimi i titujve qeveritar te Banka e Japonisë qëndron tashmë në 40% të totalit të borxhit të papaguar, që sipas organizatës, mund të dëmtojë likuiditetin dhe të sjellë destabilitet financiar kur kjo politikë të përfundojë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.