Oferta e naftës, në nivel rekord, IEA: 100 mln fuçi në ditë, pavarësisht rënies në Iran dhe Venezuelë
Oferta globale e naftës arriti një nivel rekord prej 100 milionë fuçi në ditë gjatë muajit Gusht, sipas raportit mujor të Agjencisë Ndërkombëtare të Energjisë. Rritja e prodhimit nga Organizata e Vendeve Eksportuese të Naftës ka kompensuar për rënien në vendet që nuk janë anëtarë të kartelit.
Agjencia projektoi që prodhimi nga vendet jo anëtare të OPEC të rritet me 2 milionë fuçi në ditë në vitin 2018 dhe 1.8 milionë fuçi në 2019-ën, kryesisht prej rritjes së prodhimit nga Shtetet e Bashkuara.
Ndërkohë, në muajin Gusht, oferta e naftës bruto nga OPEC shënoi nivelin më të lartë në 9 muaj prej 32.63 milionë fuçi në ditë, pavarësisht reduktimit të aksesit nga Venezuela dhe Irani. Rritja e volumit nga Nigeria dhe Arabia Saudite, si dhe prodhimi më i lartë në Libi dhe Irak, ka kompensuar për rëniet në vende të tjera.
Karteli, i përbërë nga 15 vende ra dakord për të rinisur rritjen e prodhimit në Korrik të këtij viti, që të stabilizohet tregu dhe kompensuar humbjet e furnizimit nga Irani dhe Venezuela, që janë lojtarët e tretë dhe të gjashtë më të mëdhenjtë, në mënyrë respektive.
Teherani po humbet pjesën më të madhe të tregjeve të eksportit të energjisë, ndërkohë që administrata e Donald Trump, përgatitet për të vendosur sanksione në shitjet e naftës nga data 4 Nëntor, pas përfundimit të marrëveshjes bërthamore me vendin gjatë Majit.
Në Gusht, prodhimi i Iranit ra ndjeshëm me 150,000 fuçi në ditë, në një total prej 3.63 milionë, që është niveli më i ulët që prej Korrikut 2016. Kjo erdhi prej ndërprerjes së porosive nga blerësit, prej kërcënimit për gjoba nga SHBA.
Ndërkohë, kriza e vazhdueshme ekonomike në Venezuelë, ka sjellë një kolaps të prodhimit, me 1 milionë fuçi në ditë që janë fshirë nga tregu në 2 vitet e fundit.
Nga ana e kërkesës, Agjencia ka projeksione më pak optimiste. Rritja e kërkesës globale për naftë në dy vitet e ardhshme ka mbetur e pandryshuar, në 1.4 milionë fuçi në ditë dhe 1.5 milionë bpd në mënyrë respektive.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.