Ofertat për punësim, mbahet në datat 29-31 Mars Panairi i Punës. SHKP: Procedurat për rekrutimin e punonjësve

Do të mbahet nga datat 29-31 Mars 2017 Panairi i Punës. Lajmi është dhënë nga Shërbimi Kombëtar i Punësimit, ku ky dikaster fton të gjithë të interesuarit të bëhen pjesë e Panairit që do të mbahet në Pallatin e Kongreseve.

“I nisur si një dëshirë për të sjellë ndryshimin në përshtatjen e kërkesës me ofertën, tashmë Panairi i Punës është kthyer në një institucion dhe domosdoshmëri për përshtatjen e burimeve njerëzore. Panairi i Punës është vendi ku bashkohen të gjithë aktorët e tregut të punës, aty ku konkretizohet përpjekja e punëdhënësit dhe punëmarrësit për të gjetur mënyra të vlefshme të plotësimit të vendeve të lira të punës. Mundësia që punëdhënësit të zgjedhin mes aplikantëve do të gërshetohet me mundësinë për të krahasuar ofertat e tyre me ofertat e ndryshme që do të shpallen në panair”, thuhet në njoftimin e SHKP-së .

Po sipas këtij institucioni çdo vit në mënyrë progresive janë rritur kërkesat e kompanive dhe cilësia e punëdhënies, çka e bën Panairin e Punës një markë të garantuar suksesi.

ÇFARË DO TË GJENI NË KËTË PANAIR?

Në këtë edicion, Panairi i Punës synon të hedhë një strategji të re në tregun e punës. Aty do të prezantohen nismat e qeverisë dhe partnerëve socialë duke prurë vizionin dhe politikat e tyre në lidhje me zhvillimet në tregun e punës, nevojat për aftësi, zhvillimin e karrierës, etj.

Fokusi i panairit është themelimi i një simbioze mes ekspozitës dhe forumit.

“Kompanitë do të zënë vendin kryesor, duke shpallur vendet e lira të punës sipas kritereve përkatëse, mënyrat e rekrutimit dhe sistemet e tyre të karrierës. Nga ana tjetër konferencat dhe forumet: Ekspozuesit kanë mundësinë që të demonstrojnë dhe shpjegojnë ofertat e tyre, jo vetëm brenda stendave. Ky model tërheq gjithashtu edhe vizitorët që duan të ndjekin prezantimet dhe diskutimet e paneleve. Ekspozuesit mund të marrin pjesë aktivisht në konferencë, duke rezervuar mbajtjen e leksioneve dhe prezantimeve, lidhur me shërbimet, rekrutimin, konsultimin dhe trajnimin profesional të burimeve njerëzore.  Ftohen të marrin pjesë të gjithë ata, që kërkojnë të punësojnë njerëz në profesione që mungojnë sot në treg, si hidraulik, elektricist, automekanik, rrobaqepës, parukierë, estetistë apo guida tours etj, si dhe Punëdhënësit e interesuar për të pasur mundësinë e rekrutimit të punonjësve të kualifikuar në sajë të ofertës më të mirë referuar nga zyrat tona të punësimit” thuhet në njoftimin e SHKP-së.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.