Oficerët e rinj – Xhaçka: Ndryshime në kurrikula për përgatitjen e tyre

Kurrikulat e Akademisë së Forcave të Armatosura për përgatitjen e oficerëve të rinj do të pësojnë disa ndryshime. Kështu është shprehur ministrja e Mbrojtjes, Olta Xhaçka gjatë aktivitetit të 60 vjetorit të krijimit të Akademisë së Forcave të Armatosura.

Sipas Xhçkës, përgatitja, arsimi dhe kualifikimi i specialistëve të lartë të personelit ushtarak e civil do të vazhdojë të mbetet misioni kryesor i akademisë.

“Në kushtet e zhvillimeve të reja të mjedisit të sigurisë në rajon e më gjerë, Akademia e Forcave të Armatosura do të vazhdojë të ketë për mision përgatitjen, arsimimin e kualifikimin e specialistëve të lartë e të aftë të personelit ushtarak e civil, për të gjitha nivelet e drejtimit të Forcave të Armatosura për fushën e Mbrojtjes dhe Sigurisë. Vëmendja duhet të përqendrohet tek përgatitja e oficerëve të rinj, duke filluar nga modeli që do të zgjedhim, model, i cili të jetë i integruar me arsimin e lartë kombëtar, por edhe me ato të vendeve të NATO”, – tha Xhaçka.

Ndërkohë, shtoi se qeveria ka ngarkuar Ministrinë e Mbrojtjes dhe Forcave të Armatosura për përshtatjen e ndryshimeve në kurrikula.

“Në kushtet kur qeveria shqiptare i ka ngarkuar Ministrisë së Mbrojtjes dhe Forcave të Armatosura menaxhimin e emergjencave civile edhe të iniciativës së kryeministrit, për të promovuar në detyrat e prefektëve si edhe në institucionet e tjera të sigurisë në vend, oficerët në rezervë, detyra e akademisë është të përgjigjet edhe me ndryshimet përkatëse në kurrikulat e saj me qëllim të arsimojë e kualifikojë në fushën e Sigurisë specialistë të lartë të personelit të institucioneve të tjera të sigurisë në vend”, shtoi më tej Xhaçka.

Akademia e Forcave të Armatosura përfaqëson nivelin më të lartë të arsimimit dhe kualifikimit në Forcat e Armatosura. Ajo u krijua më 10 maj 1958 dhe gjatë historisë së saj 60 vjeçare ka ndryshuar disa herë emërtimin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.