OKB, “bujare” me Shqipërinë – Rrëzon gjithë Europën. “Për ne, projeksionet për rritjen nuk ndryshojnë”
Shqipëria është ndër të paktat vende në botë dhe ndër të rrallat në Europë që i shpëton zhvlerësimit më të fundit të Organizatës së Kombeve të Bashkuara sa i përket rritjes ekonomike.
OKB në parashikimet më të fundit të ekonomisë globale për gjysmën e vitit, e vendos Shqipërinë në listën e vendeve ku nuk është rishikuar norma e rritjes ekonomike. Siç duket qartë edhe nga harta, me ngjyrën e verdhë janë të ilustruara shtetet ku projeksionet janë rishikuar në rënie, dhe ku figurojnë pjesa dërrmuese e ekonomive më të mëdha të Europës, por edhe më gjerë.
Rajoni ndërkohë është në të njëjtat ujëra me ne, me përjashtim të Malit të Zi, ndër të vetmet vende europiane që është rishikuar në rritje. Duke i`u referuar kështu projeksioneve të kaluara të Organizatës së Kombeve të Bashkuara, që i referohen muajit Janar të këtij viti, rezulton se rritja ekonomike për vendin tonë, vijon të projektohet në 4% për këtë vit dhe 3.8% vitin e ardhshëm nga institucioni.
Në nivel global, OKB projekton një ngadalësim të ekonomisë me rreth 0.2 pikë përqindje për këtë vit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.