OKB, më otpimiste për Shqipërinë – Projekton një rritje ekonomike në 4% për këtë vit
Ekonomia shqiptare do të rritet me një normë në 4% këtë vit, thotë Organizata e Kombeve të Bashkuara në raportin më të fundit të situatës ekonomike si dhe perspektivën për 2019. Projeksionet e Kombeve të Bashkuara, që publikohen çdo gjashtë muaj, rezultojnë të jenë ato më optimistet për ekonominë shqiptare. Vetëm pak ditë më parë, Banka Botërore, projektonte një normë rritje jo më të lartë se 3.6% këtë vit.
Sa i përket vitit të ardhshëm ndërkohë, ashtu si Banka Botërore, edhe OKB projekton një ngadalësim të ndjeshëm të ekonomisë, paçka se me një hap më të vogël. Projeksionet për 2020 flasin për 3.8% rritje, nga 3.6% që projekton Banka Botërore. Edhe sa i përket vitit që sapo lamë pas, projeksionet e OKB duket se janë më optimistet, pasi flasin për 4.2% rritje ekonomike, nga 4% që vlerëson Banka Botërore.
Në projeksionet më të fundit të OKB rezulton se, Shqipëria do të jetë ekonomia me rritjen më të shpejtë në rajon për këtë vit. Por, në këtë analizë nuk rezulton Kosova, që nuk është pranuar si anëtare dhe që nga ana tjetër është ekonomia me rritjen më të shpejtë në rajon. Sa i përket normës së inflacionit, OKB projekton një rimëkëmbje mjaft të lehtë, në vetëm 2.4% këtë vit. Raporti flet edhe për progresin e Shqipërisë gjatë vitit të kaluar sidomos në drejtim të papunësisë rekord të ulët si dhe të konsolidimit fiskal.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.