OKB ngre alarmin: Rekordi i nxehtësisë së Arktikut është si Mesdheu. Po lirohen CO2 dhe metani i bllokuar nën tokë!

Temperatura më e lartë e regjistruar ndonjëherë në Arktik – 38 C është konfirmuar zyrtarisht, duke rënë “kambanat e alarmit” mbi ndryshimin e klimës së Tokës. Organizata Botërore Meteorologjike (WMO) verifikoi të martën rekordin, të raportuar në qytetin siberian të Verkhoyansk më 20 qershor të vitit të kaluar.

Temperatura ishte 18 gradë Celsius më e lartë se maksimumi mesatar ditor i zonës për muajin qershor. WMO, një agjenci e OKB-së, tha se nxehtësia ekstreme “i përshtatet më shumë Mesdheut sesa Arktikut”. Është hera e parë që agjencia ka përfshirë Rrethin Arktik në arkivin e saj të raporteve të motit ekstrem. WMO tha se temperatura 38 gradë Celsius u mat në një stacion meteorologjik gjatë “një vale të jashtëzakonshme dhe të zgjatur të të nxehtit siberian”.

Nxehtësia ekstreme e vitit të kaluar në rajon kontribuoi në përhapjen e zjarreve, të cilat përfshinë pyjet dhe tokat të Rusisë veriore duke lëshuar sasi rekord karboni. Ndërsa relativisht të zakonshme në muajt e verës, temperaturat e larta dhe erërat e forta i bënë zjarret jashtëzakonisht të rënda. Temperaturat e larta në të gjithë Siberinë çuan në “humbje masive të akullit të detit” dhe luajtën një rol të madh në vitin 2020 duke qenë një nga tre vitet më të ngrohta të regjistruara, tha agjencia. Ajo shtoi gjithashtu se verifikimi i saj i rekordit të Verkhoyansk theksoi se si temperaturat po rriteshin në një rajon të rëndësishëm klimatik të botës.

Kjo është alarmuese për shkencëtarët, sepse ndërsa ngrirja e përhershme shkrihet, dioksidi i karbonit dhe metani i bllokuar më parë nën tokë lirohet. Këto gaze serrë mund të shkaktojnë ngrohje të mëtejshme dhe shkrirje të mëtejshme, në një rreth vicioz të njohur si reagime pozitive. Temperaturat më të larta gjithashtu bëjnë që akulli i tokës në Arktik të shkrihet me një ritëm më të shpejtë, duke çuar në rrjedhje më të madhe në oqean ku kontribuon në rritjen e nivelit të detit. Aktiviteti njerëzor po kontribuon në një rritje të temperaturave botërore dhe ndryshimet klimatike tani kërcënojnë çdo aspekt të jetës njerëzore.

Të lënë të pakontrolluar, njerëzit dhe natyra do të përjetojnë ngrohje katastrofike, me thatësira të përkeqësuara, rritje më të madhe të nivelit të detit dhe zhdukje masive të specieve. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.