“Oligarkët rusë, mund të bëjnë biznes në Turqi” – Cavusoglu: Për sa kohë që investimet nuk shkelin ligjet ndërkombëtare
Ministri i Jashtëm i Turqisë, Mevlut Cavusoglu, tha në fundjavë se do të mirëpres oligarkët e sanksionuar rusë në vendin e tij, si turistë dhe investitorë, për sa kohë që marrëveshjet e biznesit zhvillohen brenda ligjeve ndërkombëtare.
Turqia ka qenë në vëmendje këtë javë, ndërkohë që 2 super-jahte disa milionë dollarëshe janë parë në brigjet e vendit, që raportohet se i përkasin oligarkut Roman Abramovich.
Me secilin nga jahtet që vlerësohet se kushton 600 mln dollarë apo më shumë, Abramovich shihet se po stacionon 1.2 mld dollarë në një vend jo-anëtarë të BE, ndërkohë që përpiqet të largojë asetet jashtë fuqisë së SHBA, Britanisë apo qeverive të BE, që shënjestrojnë elitën ruse.
Turqia deklaroi se është një lëvizje legjitime, për sa kohë që jahtet qëndrojnë jashtë territoreve detare të vendeve sanksionuese.
Gjatë një interviste në një forum në Doha, Katar, ministri i jashtëm turk, Mevlut Cavusoglu, tha se çdo aktivitet që do zhvillohet, duhet të jetë i ligjshëm.
“Ne zbatojmë sanksione të miratuara nga OKB, e për rrjedhojë, qytetarët rus që kërkojnë të vizitojnë Turqinë, pa tjetër që mund ta vizitojnë”- tha ai, duke shtuar se shumë rusë kanë ardhur.
Ndërsa pyetej nëse kjo leje zgjerohet tek investimet edhe bizneset, Cavusoglu tha se oligarkët mund të bëjnë çfarë do lloj biznesi në Turqi, nëse është brenda ligjeve ndërkombëtare.
Turqia ka kritikuar hapur sulmin e paprovokuar të Rusisë në Ukrainë, por kundërshton në parim sanksionet e vendosura nga aleatët e NATOs.
Turqia është pozicionuar si një vend neutral dhe një ndërmjetësues i bisedimeve mes Rusisë dhe Ukrainës, me kryeministrin Holandez Mark Rutte, që e vlerësoi vendin për përpjekjen. Kjo e ka bërë Turqinë një destinacion për rusët që përpiqen të ruajnë pasurinë dhe të bëjnë investime në një treg gjithnjë e më armiqësor botëror.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.